Ángeles Vázquez subliña que a nova Lei do Clima permitirá que a Galicia acade a neutralidade en emisións en 2040, dez anos antes que España e Europa
A Lei do clima de Galicia está xa lista para a súa aprobación definitiva no Parlamento, feito que a Consellería de Medio Ambiente e Cambio Climático presenta como un punto de inflexión na resposta fronte ao quecemento global. A titular do departamento, Ángeles Vázquez, defendeu que a nova norma reforzará a capacidade de anticipación ante episodios extremos e marcará unha folla de ruta para adaptar servizos e infraestruturas a un escenario climático máis esixente. O texto fixa como meta que Galicia acade a neutralidade en emisións no 2040, unha década por diante dos prazos estatais e europeos.
Na súa intervención previa á votación, Vázquez subliñou o carácter pioneiro do marco legal, ao ser a primeira lei autonómica desta materia que chega á Cámara galega. A conselleira apuntou que o articulado permitirá mellorar a preparación fronte a fenómenos como inundacións, períodos de seca ou borrascas intensas —citou as recentes Harry, Ingrid ou Joseph—, e que a norma facilitará tanto a xestión das súas consecuencias como a prestación de servizos á cidadanía en condicións de seguridade.
O texto incorpora ferramentas para a gobernanza climática e aposta por proxeccións específicas para o país, elaboradas “por e para Galicia”, con información accesible orientada á toma de decisións. Prevese impulsar a sensibilización e a educación, promover a investigación aplicada e reforzar os servizos meteorolóxicos e a calidade do aire. Neste punto, a conselleira pediu mecanismos de colaboración que combinen as competencias de MeteoGalicia e da Axencia Estatal de Meteoroloxía (Aemet) mediante un acordo de cooperación. Ese pacto, explicou, debería coordinar a emisión de avisos, planificar conxuntamente novas infraestruturas e compartir en tempo real os datos das redes de observación.
A tramitación virá acompañada do respaldo económico do II Plan rexional integrado de enerxía e clima 2030, que a Xunta cifra en 1.800 millóns de euros e máis de 90 medidas. Nese programa enmárcanse actuacións para recortar emisións e de adaptación, con atención a ámbitos como a xestión da auga, o litoral, o monte, a saúde pública ou a mobilidade. Vázquez incidiu en que a normativa é transversal, “feita desde o rigor” e participada, avalada polo coñecemento técnico da Fundación Universidade da Coruña.
A responsable de Medio Ambiente sinalou que o obxectivo é dispor dun esquema estable e previsíbel, con indicadores para avaliar resultados e corrixir desviacións. Defendeu a utilidade dun marco que dea coherencia ás políticas sectoriais e sirva de referencia para concellos, empresas e entidades sociais, integrando a acción climática na planificación ordinaria. “Votar en contra é ignorar o quecemento global e votar a favor é seguir construíndo un futuro máis verde”, afirmou.•
Cargando ...
