O Concello de Quiroga acordou solicitar ao Ministerio de Transportes medidas inmediatas ante o estado da N‑120 ao seu paso por Quiroga. A entidade municipal enviará unha petición formal tanto ao Ministerio como á Subdelegación do Goberno para coñecer as actuacións previstas e o calendario de execución, ademais de reclamar que o tramo correspondente ao municipio se inclúa nun plan de mellora integral.
Segundo o executivo local, a vía presenta un deterioro notable, que supón un risco para veciñanza, transportistas e visitantes. A pesar dos traballos de mantemento realizados este ano, o Concello considera que resultaron insuficientes e que o estado da estrada empeorou.
O goberno municipal lembra a responsabilidade do Ministerio de garantir o seu correcto mantemento, e insiste na necesidade de intervencións urxentes que melloren a seguridade viaria e eviten danos nos vehículos, así como na importancia de coñecer as previsións reais de actuación.•
Cargando ...
