A parroquia de Salcedo, na Pobra do Brollón, celebrará do 14 ao 17 de febreiro o seu Entroido, unha das citas máis recoñecidas da comarca e que conta coa organización da Asociación Veciñal de Salcedo e coa colaboración da Xunta. O programa foi presentado na Delegación Territorial de Lugo, nun acto no que participaron o delegado Javier Arias e representantes do colectivo organizador, encabezados por Lucas López.
O domingo terá lugar un dos momentos centrais da festa, co pregón previsto para as 17.00 horas a cargo do antropólogo Rafael Quintía, presidente da Sociedade Antropolóxica Galega. Tras a súa intervención, sairán as Madamas e Danzantes, seguidas polos Disfraces de Campo, que cada ano atraen numeroso público pola súa singularidade.
A saída do Oso, o elemento máis emblemático deste Entroido, está programada para o luns ás 17.00 horas. A figura, acompañada polo seu séquito, percorrerá as rúas da parroquia nun dos rituais máis característicos da tradición local.
Ao longo dos catro días haberá tamén funcións de teatro e unha ampla oferta musical que animaran o espíritu festivo de Salcedo. •
Cargando ...
