O conselleiro de Presidencia, Xustiza e Deportes, Diego Calvo, participou este xoves na entrega de novos vehículos destinados a varios Grupos de Emerxencias Supramunicipais (GES), nun acto no que estivo acompañado polo director xeral de Emerxencias e Interior, Santiago Villanueva, e polo xerente da Axencia Galega de Emerxencias, Marcos Araújo. O equipamento entregado inclúe dúas bombas rurais pesadas para os GES con sede en Laza e Quiroga, así como dúas bombas urbanas lixeiras pensadas para os equipos da Guarda e do Grove. O conxunto supón un investimento próximo aos 700.000 euros, cofinanciado a través do programa Feder de Galicia.
Calvo explicou que estes vehículos incorporan sistemas avanzados de extinción, comunicacións integradas na rede corporativa de emerxencias e prestacións técnicas que permitirán mellorar a capacidade de resposta dos grupos. Segundo indicou, o obxectivo é reducir tempos de actuación e incrementar a seguridade tanto do persoal como da cidadanía. As bombas rurais, valoradas en 198.000 euros cada unha, están deseñadas para operar en zonas de difícil acceso e contan con cisternas de 3.000 litros, bombas de alta e baixa presión e carretes de primeiro socorro. Pola súa banda, as unidades urbanas, cun custo próximo aos 150.000 euros, están adaptadas para intervir en rúas estreitas e cascos históricos, e dispoñen de cisternas de máis de 1.100 litros e equipamento de extinción similar.
Os novos vehículos reforzarán o traballo dos GES que prestan servizo nos concellos de Quiroga, Folgoso do Courel, A Pobra do Brollón e Ribas de Sil, na provincia de Lugo; en Laza, Castrelo de Val, A Gudiña, A Mezquita, Riós e Sarreaus, na de Ourense; e nos municipios da Guarda, Oia, O Rosal e Tomiño, así como no Grove, Meaño, Poio e Sanxenxo, na provincia de Pontevedra.
Durante o acto, o conselleiro lembrou o investimento realizado pola Xunta en equipamento para GES e agrupacións de Protección Civil, que ascende aos 28 millóns de euros, dos que máis de 12 se destinaron directamente aos grupos supramunicipais.•
Cargando ...
