Galicia rexistrou en xaneiro un nivel de choiva moi superior ao esperado para esta época do ano. Segundo o avance climatolóxico de MeteoGalicia, a precipitación media situouse en 290 litros por metro cadrado, un 98% por riba do valor habitual da serie 1961‑2026. Con estes rexistros, o mes sitúase como o oitavo xaneiro máis húmido desde que existen datos.
A situación estivo marcada pola entrada continua de borrascas atlánticas. Francis, Goretti, Ingrid e Joseph foron as que máis incidieron no territorio, chegando a provocar avisos vermellos en varios puntos de Galicia. No caso de Ingrid, os días 22 e 23, o nivel máximo de alerta activouse no mar, mentres que as intensas precipitacións asociadas a Joseph levaron a activar por primeira vez un aviso vermello por choiva acumulada, concretamente no interior da provincia de Pontevedra o día 26. As zonas con maior acumulación de auga situáronse nas serras litorais e especialmente no oeste e suroeste da Coruña, con valores entre 550 e 700 l/m². Pola contra, no leste de Ourense, en áreas de val, os rexistros quedaron por debaixo dos 100 l/m², reflectindo un comportamento desigual segundo a orografía.
No referente ás temperaturas, xaneiro mantívose dentro da normalidade. A media situouse en 8,3, tres décimas por riba da referencia climática, segundo datos de once estacións. MeteoGalicia conclúe que, a diferenza da choiva, o mes foi térmicamente normal.•
Cargando ...
