Kern Pharma obtén unha prórroga de seis meses para iniciar a súa fábrica de inxectables no Reboredo

A empresa dispón agora ata xullo para comezar a primeira fase dun proxecto industrial que prevé catro áreas produtivas e máis de cen empregos para Monforte

O Concello de Monforte acordou ampliar en seis meses o prazo que tiña Kern Pharma para iniciar as obras da súa futura planta de medicamentos inxectables no polígono do Reboredo. A decisión adoptouse na xuntanza da Xunta de Goberno Local celebrada o pasado luns, logo de analizar a solicitude formal presentada pola compañía o día 22 de xaneiro a través da sede electrónica. O alcalde, José Tomé, salientou que esta petición “amosa que o interese da empresa por instalar aquí o seu proxecto” se mantén a pesar dos atrasos acumulados nos últimos exercicios.
Kern Pharma é propietaria das parcelas unificadas 1C, 2C e 3C da rúa 3 do parque empresarial, adquiridas entre 2019 e 2021. Conxuntamente suman preto de vinte mil metros cadrados e sitúanse na zona máis próxima ao concello de Sober. Nese espazo está prevista a construción dunha fábrica de arredor de 14.000 metros cadrados, concibida para funcionar con catro liñas produtivas diferenciadas e diversas áreas auxiliares de apoio.
A firma xa trasladara ao Concello que o atraso no arranque do proxecto obedecía a un conxunto de circunstancias que afectan ao sector farmacéutico. Entre elas figuran as consecuencias económicas derivadas da pandemia, o encarecemento da obra civil e da maquinaria industrial necesaria para este tipo de instalacións e a presión competitiva do mercado internacional, especialmente polo crecemento dos medicamentos xenéricos fabricados en China e India. Estes factores, segundo expuxeron directivos da empresa en encontros previos co goberno local, ralentizaron a implantación de novas plantas en varios países europeos.
O proxecto presentado por Kern Pharma no seu momento establecía catro áreas de produción. A primeira fase, á que corresponde a licenza agora prorrogada, contempla levantar a infraestrutura civil necesaria e activar a liña dedicada á fabricación de ampollas, que será a primeira en entrar en funcionamento. As outras tres liñas distribuiranse entre a produción de viais e dous espazos orientados ao desenvolvemento de proxectos de innovación. Ademais das zonas destinadas á fabricación, o deseño inclúe laboratorios, área loxística e oficinas, seguindo criterios de ecoeficiencia e sustentabilidade.
Segundo os cálculos iniciais, o investimento total previsto achégase aos 60 millóns de euros, dos cales 33 millóns corresponden a esta primeira etapa. No momento da presentación pública do proxecto, en setembro de 2022, a compañía tiña como horizonte iniciar a actividade produtiva no primeiro semestre de 2025. Porén, as previsións foron variando ao longo do tempo e, aínda que o Concello confiaba en avances durante o último trimestre de 2025, finalmente o calendario volveu atrasarse.
A nova prórroga estende a vixencia da licenza ata xullo de 2026, prazo no que a empresa deberá comezar as obras se quere manter a autorización municipal. O alcalde lembrou que o Executivo local segue en contacto cos responsables de Kern Pharma e que o Concello considera esta iniciativa industrial unha aposta estratéxica tanto para Monforte como para o conxunto da comarca, polo impacto económico e laboral que representa. Con todo, insistiu en que será a empresa quen marque os ritmos, condicionados pola evolución do mercado farmacéutico e polas decisións de investimento que adopte o grupo empresarial.•