A segunda edición da Feira da FP reuniu a alumnado, familias e profesorado en máis de vinte obradoiros e espazos demostrativos
O IES Francisco Daviña Rey de Monforte de Lemos celebrou os días 3, 4 e 5 a segunda edición da Feira de FP, un encontro no que o centro abriu as súas portas ao alumnado da contorna, ás familias e a quen desexase coñecer de primeira man a formación profesional que se imparte no instituto. O obxectivo, segundo explica a dirección, é achegar as distintas familias profesionais ás persoas interesadas e mostrar os proxectos que o alumnado desenvolve ao longo do curso.
A feira estruturouse en visitas matinais para estudantes de Primaria e Secundaria de Monforte e municipios próximos, mentres que o xoves pola tarde se reservou unha quenda aberta ao público xeral. O instituto oferta ciclos das áreas de Sanidade, Electricidade e Electrónica, Transporte e Mantemento de Vehículos e Servizos Socioculturais e á Comunidade. Cada departamento instalou espazos expositivos con maquetas, equipamento técnico e materiais didácticos elaborados polo alumnado.
O programa incluíu obradoiros prácticos como a elaboración dun insectario, simulación de limitacións físicas mediante un traxe de edadismo, demostracións de extracción de sangue e determinación do grupo sanguíneo, prácticas de hixiene dental e sesións de reanimación cardiopulmonar. Nas áreas tecnolóxicas realizáronse actividades de programación, domótica, impresión 3D, corte con láser, control remoto de vehículos, probas de condutividade eléctrica e manexo de drons. O alumnado de automoción amosou procedementos básicos de mantemento, mentres que a área de Educación Infantil exhibiu recursos de estimulación temperá e materiais pedagóxicos creados no centro.
A Tenente de Alcalde, Gloria Prada, visitou a feira acompañada pola directora, Raquel Aira, e participou nalgunhas demostracións. A representante municipal experimentou simulacións de mobilidade reducida, coñeceu materiais de aula infantil e tomou parte en prácticas asistenciais como unha analítica, unha consulta odontolóxica simulada e exercicios de RCP e da manobra de Heimlich. Tamén visitou a vivenda domótica instalada polo alumnado e puido probar unha máquina recreativa construída no propio instituto.
Prada destacou o traballo do profesorado e do alumnado na preparación dos espazos e salientou que a feira ofrece unha oportunidade para que o estudantado de ESO e Primaria coñeza de maneira directa as opcións que ofrece a FP. A dirección do centro valora que a iniciativa permite mostrar o labor diario que se desenvolve nas aulas e contribúe a reforzar a imaxe da FP como unha vía formativa vinculada á innovación e ao emprego.•
Cargando ...
