Foto GPPP.
A posta en marcha dun segundo equipo de hospitalización a domicilio (HADO) no Hospital de Monforte permitiu ampliar o servizo aos concellos de Chantada, Carballedo, Quiroga e Ribas de Sil, ademais dos que xa estaban cubertos (Monforte, Bóveda, A Pobra do Brollón, Pantón, Sober e O Saviñao). Segundo salientaron as deputadas populares Katy Varela, Encarna Amigo e Raquel Arias, a ampliación supón un salto cuantitativo na actividade, con máis de 15.000 pacientes atendidos desde a implantación do modelo no distrito sanitario.
O novo equipo está integrado por un médico, tres enfermeiras e un vehículo propio, co obxectivo de garantir atención continuada, coordinada e de proximidade. “Trátase dun modelo que achega coidados de rango hospitalario no fogar, con garantías de calidade, seguridade e humanización”, subliñou Varela, quen enmarcou a medida no reforzo da asistencia na comarca.
A hospitalización a domicilio diríxese a patoloxía médica aguda, crónica agudizada ou avanzada, pacientes paliativos e persoas que, tras unha intervención cirúrxica, poden completar a recuperación na casa, evitando ingresos e estancias innecesarias. Para Amigo, nun territorio con poboación envellecida e elevada presenza de enfermidades crónicas, o HADO é “clave para mellorar a calidade de vida dos doentes e optimizar recursos sen perder capacidade resolutiva”.
Co reforzo, a poboación potencialmente atendida supera as 43.000 persoas.•
Cargando ...
