As intensas precipitacións rexistradas nas últimas xornadas provocaron un derrube de pedras na muralla romana de Lugo, no tramo interior situado á altura da rúa do Moucho, entre as portas do Carme e de Santiago. O desprendemento produciuse o xoves e non causou danos persoais, aínda que foi necesario acordoar a zona afectada para garantir a seguridade de peóns e visitantes que transitan habitualmente por este punto do monumento.
O conselleiro de Cultura, Lingua e Xuventude, José López Campos, desprazouse este sábado ao lugar do incidente, onde explicou que a caída de material afectou a un lenzo interior que non forma parte do trazado orixinal da muralla, senón dunha reconstrución executada nas primeiras décadas do século pasado. “Trátase dun desprendemento que, afortunadamente, non tivo consecuencias persoais”, sinalou, ao tempo que apuntou á acumulación de auga como causa principal da incidencia.
Técnicos de Patrimonio realizaron unha primeira inspección na noite do propio xoves e está previsto que os traballos de reparación se inicien de inmediato. Ademais da intervención puntual, nos vindeiros días levarase a cabo unha revisión completa do perímetro para comprobar se existen afeccións noutros tramos, aproveitando os sistemas de monitorización implantados.
A muralla de Lugo, declarada Patrimonio da Humanidade no ano 2000, xa rexistrou derrubes similares en episodios anteriores de choiva intensa, como o ocorrido nas inmediacións do antigo hospital de Santa María pouco despois do recoñecemento da Unesco.•
Cargando ...
