Xa se está a traballar para deseñar a programación do Ano Oteriano, que conmemora o cincuenta aniversario do pasamento e o centenario da publicación de Guía de Galicia. Así o destacou o conselleiro de Cultura, Lingua e Xuventude, José López Campos nun encontro que tivo lugar na Cidade da Cultura que contou coa presenza do secretario xeral da Lingua, Valentín García, e do director xeral de Cultura, Anxo M. Lorenzo. Durante a reunión, López Campos subliñou a implicación de trinta institucións, entre as que se atopan a Fundación Otero Pedrayo, a Real Academia Galega, o Consello da Cultura Galega e as fundacións Vicente Risco, Rosalía e Castelao. “Tiñamos claro que o Ano Oteriano é un dos fitos deste 2026 e que a lembranza á figura e ao legado do Patriarca das Letras Galegas debía contar coa máxima implicación cultural e social”, explicou. A todas as entidades facilitouse un formulario para canalizar propostas e configurar unha programación conxunta.
O obxectivo é artellar unha programación ampla e transversal que poña en valor a figura de Otero Pedrayo e difunda o seu legado intelectual e literario. López Campos definiuno como “un dos piares do florecemento cultural e intelectual de Galicia, representante dunha xeración que soubo vincular o galeguismo coa cultura universal e co compromiso coa nosa terra”. Recordou tamén a súa participación no Grupo Nós e na Editorial Galaxia, así como a súa traxectoria como mestre, ensaísta, novelista, xeógrafo, político e membro das Irmandades da Fala, cunha contribución decisiva á Galicia moderna. O conselleiro subliñou que a celebración non se limitará ao recoñecemento institucional, senón que busca manter acesa a vixencia da súa obra e identidade cultural, combinando iniciativas educativas, literarias, históricas e divulgativas que permitan achegar a figura de Otero Pedrayo á sociedade galega contemporánea e ás novas xeracións.
Ramón Otero Pedrayo (Ourense, 1888-1976) é unha das figuras centrais da literatura galega e da cultura da modernidade, coa súa obra influínte en múltiples disciplinas e un referente na historia do galeguismo e do pensamento democrático en Galicia.•
Cargando ...
