As axudas permitirán avanzar en investimentos estratéxicos, mellorar a competitividade das adegas e reforzar a presenza internacional dos viños da Ribeira Sacra
O Diario Oficial de Galicia fixo públicas as resolucións da Consellería do Medio Rural relativas ás axudas destinadas á elaboración, comercialización e promoción exterior de produtos vitivinícolas correspondentes á convocatoria de 2025. En total, son 45 as entidades beneficiarias das dúas liñas, que mobilizan máis de 6,7 millóns de euros en apoios ao sector.
A partida máis ampla corresponde aos programas de elaboración e comercialización, que chegan a 27 adegas, maioritariamente situadas nas provincias de Ourense e Pontevedra. Esta liña achega máis de 5,4 millóns de euros para impulsar investimentos que superan os 18 millóns. O obxectivo, segundo a Consellería, é favorecer “a mellora do rendemento global das empresas e a súa adaptación ás demandas actuais”, ademais de reforzar a competitividade nun mercado cada vez máis esixente.
As actuacións subvencionadas inclúen medidas para avanzar na certificación ambiental, fomentar a produción ecolóxica e apoiar produtos vinculados a selos de calidade. Tamén se busca estimular a innovación, a incorporación de tecnoloxías dixitais e o incremento da dimensión empresarial, así como reforzar a presenza dos viticultores na cadea de valor.
No ámbito da promoción en terceiros países, a Xunta concede axudas a 18 entidades, cun importe global de 1,27 millóns de euros e un investimento asociado que supera os 2,5 millóns. Estes fondos pretenden difundir as características e calidade dos viños galegos fóra da UE, co fin de mellorar a súa posición competitiva.•
Cargando ...
