A nova tempada dos Trenes Turísticos de Galicia, que arrincará o 7 de marzo coa Ruta das Camelias, volverá situar a Ribeira Sacra como un dos destinos estrela dun programa que combina patrimonio, natureza e viaxe en ferrocarril. A campaña inclúe 13 itinerarios temáticos promovidos por Renfe, Turismo de Galicia e o Inorde, entre eles as rutas polo Sil e polo Miño, que se desenvolverán entre xuño e setembro e son tradicionalmente das máis demandadas polos viaxeiros. A ruta do Sil ofrecerá saídas o 6 e o 27 de xuño, o 11 de xullo, o 1 e o 22 de agosto e o 12 de setembro, mentres que o percorrido polo Miño terá lugar o 13 de xuño e os días 5 e 26 de setembro, achegando aos visitantes a enclaves como Os Peares, Pantón ou as adegas que conforman a paisaxe vitivinícola da denominación de orixe. Nesta edición repítese tamén o itinerario Valdeorras–Ribeira Sacra, cunha saída o 4 de xullo e outra o 19 de setembro, que conecta ambas comarcas a través dos seus principais recursos enoturísticos. Os billetes para as primeiras saídas xa están dispoñibles e o resto das rutas incorporaranse de maneira progresiva. A organización recomenda anticipar a compra, tendo en conta que estas propostas adoitan acadar altos niveis de ocupación durante a tempada alta.•
Cargando ...
