A conselleira do Medio Rural, María José Gómez, visitou recentemente os terreos da agrupación forestal de xestión conxunta San Pedro do Incio, onde salientou o papel destas fórmulas para impulsar a actividade produtiva e combater o abandono do monte. Na visita, acompañada pola directora xeral Luisa Piñeiro, explicou a nova liña de axudas destinada ás agrupacións, dotada con 2,1 millóns de euros para os anos 2026 e 2027, cun notable incremento respecto da convocatoria anterior. As subvencións inclúen dous itinerarios: apoiar a creación de novas agrupacións, básicas ou con base territorial, e reforzar o traballo das xa inscritas a través de novos procesos e actividades. O prazo de solicitude permanecerá aberto ata o 17 de abril.
Gómez destacou tamén o avance do Plan piloto para a recuperación dos soutos, no que participa a agrupación de San Pedro do Incio, integrada por 39 propietarios que achegan 56 hectáreas. A súa incorporación ao modelo de xestión conxunta permitiu pasar dunha estrutura fragmentada a outra coordinada, na que se executaron actuacións de conservación por valor de 142.000 euros, xunto con achegas adicionais orientadas a ampliar a superficie xestionada e avanzar cara unha ordenación forestal máis sostible. Gómez sinalou que estas medidas reforzan a xestión forestal no rural galego.•
Cargando ...
