Tres alumnos do Ciclo Medio de Cociña e Gastronomía do CPR Belarmino Fernández Iglesias comezan esta semana unha nova etapa formativa no estranxeiro ao abeiro do programa Erasmus+. As estadías, que se prolongarán ata mediados de maio, permitirán completar a súa formación en empresas hostaleiras de Italia e Portugal.
Dous dos estudantes desprazaranse á cidade italiana de Arezzo, un destino no que o centro mantén colaboración estable con varios establecementos. A directora e coordinadora Erasmus+, Rebeca Vázquez Iglesias, lembrou que “nos últimos anos o alumnado tivo alí experiencias moi positivas, tanto a nivel profesional como persoal”.
Como novidade, unha alumna realizará prácticas nun restaurante de Oporto, ampliando así as opcións internacionais dispoñibles para o ciclo. A participación nesta mobilidade supón un paso máis na aposta pola internacionalización da Formación Profesional que o centro desenvolve grazas á súa acreditación VET, vixente ata 2027.
O centro incide en que estas estancias permiten mellorar as competencias técnicas, fortalecer habilidades lingüísticas e coñecer outras culturas gastronómicas, favorecendo a inserción laboral futura do alumnado no mercado gastronómico.•
Cargando ...
