A concelleira renuncia por “motivos persoais” e a súa substitución prevese para finais de marzo, mentres a oposición mantén a presión polo futuro do alcalde
A concelleira de Muller e Igualdade de Monforte, Margarita López Rodríguez, renunciou á acta no pleno do luns. O alcalde, José Tomé, deu conta da decisión ao remate da sesión, despois de que a edil a comunicase horas antes alegando «motivos persoais».
López ía no décimo posto da lista coa que o PSOE logrou dez das 17 actas en 2023 e integrou os executivos de Tomé desde o primeiro mandato, á fronte de Igualdade. Co resultado das municipais, o PP quedou con catro edís, o BNG con dous e Esperta Monforte con un, o que consolidou a maioría absoluta socialista no salón de plenos. A súa saída prodúcese no medio da polémica polas denuncias internas de presunto acoso sexual contra o rexedor. As acusacións fixéronse públicas en decembro de 2025 a través da TV e Tomé negounas, falando de montaxe e anunciando medidas legais; días despois dimitiu como presidente da Deputación de Lugo e pediu a suspensión cautelar de militancia, mais mantivo a Alcaldía como non adscrito. Segundo os testemuños difundidos, as denunciantes describiron tocamientos non consentidos, chamadas e mensaxes con contido sexual e mesmo ofrecementos de emprego a cambio de favores. O 30 de decembro formalizouse a renuncia na Deputación e quedou rexistrada a súa condición de deputado non adscrito nun pleno extraordinario. Nas últimas semanas, PP, BNG e Esperta Monforte reclamaran a dimisión de López pola súa falta de resposta política tras se coñecer as denuncias, e o BNG avanzou que non estará nos actos institucionais do 8M organizados polo concello, promovendo unha axenda propia na comarca. A vacante comunicarase á Xunta Electoral e prevese que a substitución se formalice no pleno de finais de marzo; de respectarse a lista, entraría Miguel Tomé López, fillo do alcalde. No pleno, Tomé agradeceu o labor da concelleira: «Compañeira Margarita, darche as grazas polo traballo de todos estes anos. Estou convencido de que vas seguir traballando polo PSOE e colaborando con este equipo de goberno».
Margarita López: “Non deixo a loita, non deixo os valores que me inculcou unha nai que hoxe ten 91 anos e necesítame física e emocionalmente ao seu lado. Só cambio o lugar desde o que seguir defendendo unha sociedade máis xusta, máis libre e máis humana. E seguireino facendo desde o Partido Socialista, porque os maiores avances sociais fixéronse desde o Partido Socialista. En especial en materia de igualdade e violencia de xénero»
Pola súa banda, López fixo balance e apelou á utilidade pública das políticas de igualdade: «Hoxe non é un adeus calquera . Hoxe voume coa tranquilidade de intentalo con honestidade e compromiso», afirmou, engadindo que non abandona esa defensa: » Non deixo a loita. Só cambio o lugar desde o que seguir defendendo unha sociedade máis xusta».
Desde o BNG recoñeceron o paso a un lado de López e advertiron de que a crise institucional segue aberta mentres o alcalde continúe no cargo. «Non se poden dar leccións de feminismo desde o propio concello mentres non se actúe de maneira consecuente», indicaron, cualificando a decisión da exedil de «responsable e valente».
O PP cualificou de «inaceptable» a actitude do rexedor e volveu pedir a súa dimisión. A portavoz popular, Katy Varela, considerou «preocupante» que a marcha de Igualdade coincida co caso e que entre na corporación o fillo do alcalde, porque «agrava a percepción pública de clientelismo e enchufismo» e «non axuda á credibilidade das políticas de igualdade». Os populares lamentaron tamén que sexa a concelleira quen dea o paso, e non quen, din, debe despejar a «sombra da dúbida» sobre as condutas que se lle atribúen.
O pulso político en Monforte xa deixara episodios de alta tensión na fin de 2025: concentracións feministas convocadas pola Marcha Mundial das Mulleres na praza do Campo de San Antón, con preto dun cento de persoas, e un pleno bronco no que Tomé Roca confirmou que seguiría no posto e que pasaría a non adscrito desde o 1 de xaneiro.
Mantense, polo tanto, a crise política no concello de Monforte, logo dun bronco pleno que rematou coa nova da dimisión de Margarita López. •
Cargando ...
