O acordo coa Confederación Hidrográfica Miño-Sil eleva a máis de 5,6 millóns de euros a actuación vinculada á nova depuradora
O Concello de Monforte acordou coa Confederación Hidrográfica Miño-Sil a modificación do convenio de 2023 para a construción da nova estación depuradora de augas residuais (EDAR) no Polígono Industrial do Reboredo, co obxectivo de ampliar a intervención e renovar completamente o saneamento desta área industrial. A actualización do acordo eleva a inversión total ata 5.638.154,36 euros, dos que 4.885.431,21 euros serán aportados pola Confederación e 752.723,15 euros polo Concello. A estas cifras súmase o custo do terreo da nova depuradora, un solar de 5.000 metros cadrados adquirido por 117.975 euros.
Segundo explicou o alcalde, José Tomé Roca, a modificación responde á necesidade de acometer unha obra complementaria que permitirá instalar unha rede separativa de augas pluviais e residuais en todas as rúas do polígono, garantindo a desconexión das augas da nova EDAR. Esta medida, segundo o rexedor, “suporá unha mellora substancial no tratamento das augas e reducirá os riscos de contaminación, optimizando a eficiencia da depuradora”. O acordo modifica tamén as anualidades previstas, estendendo a execución ata 2027 e incorporando un incremento de preto de 930.000 euros no importe inicial do proxecto.
A futura depuradora, actualmente en fase de construción, foi deseñada para cubrir tanto as necesidades actuais do polígono como as previstas nas ampliacións en curso, que elevarán a superficie industrial a 800.000 metros cadrados. Contará cun funcionamento modular, permitindo adaptarse á demanda e futuras ampliacións. A instalación terá capacidade para tratar 1.000 metros cúbicos diarios de augas residuais e estará preparada para xestionar residuos específicos, como os procedentes da industria láctea.
A infraestrutura inclúe tamén a condución das augas tratadas ata a depuradora de Piñeira mediante un emisario de máis de 1,5 quilómetros, evitando vertidos directos ao entorno e recuperando o estado natural do regato do Carballo. Ademais, o proxecto prevé a instalación de dúas liñas de canalización por cada rúa do polígono, unha para pluviais e outra para residuais, así como a posibilidade de engadir un terceiro reactor biolóxico e decantador secundario para ampliar a capacidade de tratamento. O pretratamento e a liña de lodos tamén se deseñaron para acoller os caudais previstos coas futuras ampliacións, asegurando que o sistema manteña os parámetros de calidade establecidos pola normativa.
O alcalde destacou que a antiga depuradora resultaba insuficiente para a crecente actividade industrial e que a nova instalación marcará “un antes e un despois no desenvolvemento económico do polígono e no emprego, ao mellorar a capacidade de depuración e favorecer a expansión empresarial”.
A colaboración entre o Concello de Monforte e Confederación consolida unha actuación que combina investimentos estruturais, protección ambiental e planificación a longo prazo, garantindo que o Polígono conte cun saneamento eficiente e preparado para as demandas futuras.
Esta intervención tamén incorpora medidas de sustentabilidade e eficiencia, ao permitir a ampliación progresiva da depuradora na parcela colindante, e reforza a aposta pola calidade ambiental, ao asegurar que as augas depuradas se integren de forma segura na rede fluvial, promovendo a recuperación ecolóxica do río Cabe e do seu entorno.•
Cargando ...
