Monforte acollerá do 3 ao 5 de xullo o I Campionato de Europa IPPA de Pitch & Putt, unha competición que situará o campo de Ribas Altas no foco internacional desta modalidade. A presentación celebrouse no Concello, nun acto no que participaron o alcalde, José Tomé Roca, xunto co presidente do Club de Golf Río Cabe, José Ángel Pérez Reñones, e o xerente da entidade, Alberto Pérez Galán. O evento reunirá preto de 160 xogadores procedentes de diferentes países, ademais de árbitros, técnicos e acompañantes, polo que se prevé unha chegada total próxima ás 400 persoas.
Trátase dunha cita organizada baixo o paraugas da International Pitch and Putt Association (IPPA), entidade que regula e impulsa esta disciplina a nivel global. Desde o Concello salientouse que a elección de Monforte responde tanto á calidade das instalacións como á traxectoria recente do club, que nos últimos anos xa acollera probas estatais de gran relevancia, entre elas o Campionato de España de Federacións Autonómicas en 2025 e o Campionato de España Masculino en 2024.
O campo de Ribas Altas, con 18 hoyos Par 3 e unha distancia total próxima aos 1.200 metros, está considerado idóneo para o chamado “golf rápido”, modalidade na que os percorridos curtos permiten competicións máis dinámicas e intensas. Pérez Reñones destacou que “o ambiente é incrible” e agradeceu o apoio institucional, lembrando que o Concello achegará 4.000 euros, aproximadamente un terzo do orzamento total.
A chegada desta competición terá un impacto significativo na cidade e na comarca. A coincidencia do campionato co Festival do Viño da Ribeira Sacra, que se celebra ese mesmo fin de semana, permitirá reforzar a proxección turística do territorio. A previsión é que a ocupación hoteleira aumente de maneira notable e que sectores como a gastronomía, o comercio e o ocio se beneficien da chegada de visitantes internacionais.
O Concello agradeceu ao Club Río Cabe a labor de xestión ante as entidades federativas e desexou sorte aos xogadores locais que participarán na competición.•
Cargando ...
