O pregón da 43ª edición da festividade correu a cargo do humorista e presentador de televisión Roberto Vilar, e entregáronse os premios aos mellores viños
A Feira do Viño de Chantada viviu unha das edicións máis concorridas das últimas décadas, nun día grande de pregón no que a climatoloxía favorable e o ambiente festivo contribuíron a atraer milleiros de persoas á vila. A cita, que inaugura o calendario das feiras vitivinícolas da zona da Ribeira Sacra, comezou coa actuación da Banda de Gaitas do Concello, que abriu unha programación marcada pola tradición e pola reivindicación social. A concelleira de Igualdade, Pamela Fernández, foi a encargada de ler o Manifesto do 8M, nun acto que contou cunha ampla participación e que puxo o foco na igualdade e no papel das mulleres no ámbito rural.
O pregón desta 43ª edición correu a cargo do humorista e presentador Roberto Vilar, que foi recibido cunha grande expectación. O pregoeiro ofreceu un discurso no que combinou humor, emoción e lembranzas persoais, evocando ás xeracións maiores e destacando o valor da terra e das persoas que a traballan. “Esa xente apegada á Terra, coma aquí en Chantada”, afirmou, antes de salientar a singularidade da Ribeira Sacra e a calidade dos seus viños. Vilar compartiu tamén referencias á súa familia e ao seu vínculo coa provincia, nunha intervención que conectou de maneira directa co público e que foi seguida con atención polos asistentes.
No palco de autoridades estiveron presentes representantes da Xunta, da Deputación de Lugo, cargos públicos e alcaldes da contorna, ademais do alcalde de Chantada, Manuel Lorenzo Varela. O rexedor agradeceu a implicación das adegas participantes e destacou a excelente colleita deste ano, lembrando tamén figuras históricas que contribuíron á mellora da viticultura local. Varela subliñou o papel da feira como escaparate do traballo das adegas e como motor económico para o municipio, ao tempo que puxo en valor o esforzo das persoas que manteñen viva a tradición vitivinícola.
A xornada incluíu a entrega dos premios das catas popular e oficial, nas que foron recoñecidos diversos viños tintos, brancos e rosados. Na cata popular, na que participaron máis de cen persoas, destacaron referencias de Adega Lareu, Instinto Romano e Vía Romana. Pola súa banda, a cata oficial premiou once viños valorados por un panel profesional composto por enólogos, docentes e especialistas do sector, que salientaron a calidade da colleita e o bo nivel das adegas participantes.
O ambiente festivo, a elevada participación e a calidade dos viños volveron situar a Feira do Viño de Chantada como un dos eventos máis destacados do panorama vitivinícola galego. A organización destacou o bo desenvolvemento da xornada e a resposta do público, que un ano máis consolidou esta cita como un referente cultural, social e económico para a comarca.•
Cargando ...
