A crise institucional aberta en Monforte deu un salto cualitativo a pasada semana despois de que a Fiscalía de Lugo confirmase a tramitación dunha denuncia por presunto acoso sexual contra José Tomé Roca, alcalde da cidade e expresidente da Deputación. A querela, presentada por unha particular, introduce por primeira vez o asunto na vía penal tras semanas de informacións mediáticas e desmentidos públicos por parte do propio Tomé, quen insistira ata agora en que non existía denuncia formal contra el. Con esta confirmación, o escenario político na comarca quedou completamente alterado e multiplicáronse as peticións de dimisión do rexedor.
O PSdeG, partido ao que pertence Tomé, emitiu un comunicado no que insiste no respecto á presunción de inocencia, pero admite que a entrada da denuncia na Fiscalía obriga a suspender o procedemento interno aberto no seu Canal Antiacoso. A dirección socialista asegura que o proceso xudicial debe desenvolverse con “todas as garantías” e sinala que actuará en función do que se determine, insistindo en que a decisión de denunciar sempre corresponde á vítima e que “vivimos nun Estado de Dereito no que a Xustiza debe actuar con rigor”.
A reacción máis contundente chegou desde o Partido Popular. A secretaria xeral do PPgalego, Paula Prado, reclamou “responsabilidades políticas inmediatas” e acusou ao PSOE e ao BNG de manter unha actitude “cómplice” ao non esixir xa a saída do alcalde. Nun encontro en Monforte con cargos do seu partido, Prado cualificou de “insostible” a permanencia de Tomé na Alcaldía e pediu a súa dimisión tanto no Concello como na Deputación, onde aínda conserva acta de deputado provincial. Xunto a ela, a portavoz municipal dos populares, Katy Varela, cualificou a situación de “vergoñenta”, de feito o PP non acudiu aos actos do 8M pola presenza do alcalde neles.
Tamén o BNG fixo pública a súa postura. A formación nacionalista, que xa expresara preocupación polas primeiras informacións, considera que o Concello se atopa nunha situación “institucionalmente insostible” e defende que a responsabilidade política é independente da xudicial. O voceiro do Bloque en Monforte, Emilio J. Sánchez, afirmou que “a exemplaridade no exercicio do cargo é unha obriga democrática” e pediu que Tomé dea un paso ao lado para evitar un maior dano á institución. O BNG advertiu ademais do impacto que esta situación está tendo na representación institucional da cidade, lembrando que o Concello non foi convidado ao acto oficial da Feira do Viño de Chantada para evitar compartir espazo co alcalde.
Mentres tanto, no propio Concello a tensión medrou nos últimos días. O grupo municipal do PP ofrecou os seus votos para facilitar unha alternativa de goberno que permita substituír a Tomé, ao considerar que a cidade precisa “recuperar a dignidade da Alcaldía”. Nunha comparecencia, Varela acusou o PSOE de “normalizar unha situación gravísima” e instou aos concelleiros socialistas a apoiar un cambio de goberno que “devolva estabilidade a Monforte”. Para os populares, a permanencia de Tomé no cargo supón un “lastre” que prexudica a imaxe da cidade e pode frear investimentos.
A nivel provincial, a polémica tamén tivo repercusión. Os deputados do PP na Deputación de Lugo pediron explicacións públicas á presidenta, Carmela López (PSOE), e ao vicepresidente, Efrén Castro (BNG), pola continuidade do pacto de goberno co alcalde monfortino. O voceiro popular, Antonio Ameijide, reafirmou que o executivo provincial non tería saído adiante sen o voto de Tomé e acusou aos partidos de goberno de manter unha actitude “cómplice” ao non actuar tras coñecerse novos detalles do caso. Para Ameijide, “o PSOE preferiu protexer ao presunto agresor antes que á vítima” e reclamou a dimisión inmediata de todos os cargos implicados en coñecer ou non comunicar a suposta situación.
Por agora, José Tomé mantivo silencio público tras a confirmación da querela e segue desempeñando as súas funcións institucionais. A investigación da Fiscalía continuará o seu curso mentres a presión política e social aumenta nunha das maiores crises institucionais das últimas décadas.•
Cargando ...
