A cuarta edición da Vuelta Feminina by Carrefour.es situará este ano o sur de Lugo no mapa deportivo internacional cunha das etapas máis destacadas do trazado: a que unirá Monforte de Lemos e Antas de Ulla e que levará o pelotón a percorrer Sarria, Láncara, Páramo, Portomarín, Ventas de Narón, Taboada e Monterroso. A presentación oficial celebrouse no Auditorio Municipal de Ribeira e confirmou que a carreira, do 3 ao 9 de maio, reunirá ciclistas de primeiro nivel como Pauline Ferrand‑Prévot, Marianne Vos, Lotte Kopecky, Marlen Reusser e as españolas Mavi García e Paula Blasi.
A saída da cuarta etapa terá lugar o mércores 6 de maio na Praza da Compañía de Monforte, desde onde o pelotón avanzará polo centro urbano antes de encarar o percorrido cara Sarria, un dos puntos máis recoñecidos da comarca. O alcalde, José Tomé, participou no acto oficial e destacou a capacidade da proba para “proxectar ao exterior o patrimonio histórico, artístico e natural de Monforte” e reforzar o atractivo turístico e económico da cidade. Segundo avanzou a organización, será unha etapa esixente, con tramos de media montaña e un final en ascenso en Antas de Ulla.
A presenza da carreira en Sarria terá especial relevancia pola súa condición de punto de partida máis habitual para os peregrinos do Camiño Francés, o que permitirá mostrar unha das zonas máis coñecidas e transitadas da provincia. O paso das ciclistas polo casco urbano e polas estradas da contorna achegará unha imaxe singular da vila, nunha xornada que combina o deporte de elite coa proxección dun territorio vencellado ao turismo, á paisaxe e ao patrimonio cultural.
A Vuelta Feminina contará cunha ampla cobertura informativa, con emisión en directo de RTVE para España e Eurosport para o resto de Europa. A organización estima a presenza de xornalistas especializados de ata nove nacionalidades, o que situará novamente a comarca no foco mediático. Segundo lembrou o alcalde, a edición anterior acreditara máis de cen profesionais de medios escritos, radiofónicos e televisivos, cifras que previsiblemente se repetirán.•
Cargando ...
