Rueda defende que a iniciativa permitirá ampliar a presenza de profesionais en todos os ámbitos, mentres reivindica as políticas públicas de igualdade
O acto institucional do Día Internacional das Mulleres reuniu o 7 de marzo na Coruña representantes institucionais, entidades sociais e numerosas profesionais nun evento no que o presidente da Xunta, Alfonso Rueda, anunciou a posta en marcha da plataforma Presentes. A iniciativa, impulsada pola Consellería de Política Social e Igualdade, foi presentada como unha ferramenta destinada a aumentar a visibilidade das mulleres nos espazos públicos e favorecer a súa participación en debates, actos e proxectos profesionais. Durante a súa intervención, Rueda subliñou que o obxectivo é “darlles visibilidade a expertas de todas as áreas para que protagonicen o espazo público”, e agradeceu ás primeiras 2.000 inscritas “por dar ese paso adiante e estar presentes”.
No acto destacouse tamén que máis de 100 entidades colaboraron na identificación de perfís profesionais, permitindo crear unha base inicial ampla e diversa. O presidente chamou a seguir avanzando no compromiso coa igualdade e lembrou que o orzamento destinado a políticas de igualdade en 2026 ascende a 29 millóns de euros, cunha aposta centrada no Plan Corresponsables, no programa Emega de emprendemento feminino e na elaboración da primeira Estratexia Galega de Emprego Feminino en Sectores Masculinizados. Ademais, instou a manter a igualdade como principio transversal nas políticas públicas e a combater con firmeza a violencia de xénero ao longo de todo o ano. O acto institucional incluíu, ademais, a presentación das protagonistas da campaña do 8M, mulleres referentes de sectores como o audiovisual, a industria, a automoción, o ámbito tecnolóxico ou o forestal.
PRESENTES, A MAIOR PLATAFORMA DE PROFESIONAIS GALEGAS
Presentes xorde tras constatar que, malia os avances das últimas décadas, persiste a infrarrepresentación feminina nos espazos de decisión, nos paneis de expertas e nas áreas STEM, non sempre por falta de talento, senón pola dificultade de localización e pola escasa visibilidade das especialistas. Presentes pretende superar ese obstáculo ofrecendo un directorio aberto de consulta que permita a organizadores de xornadas, medios de comunicación, entidades e institucións contactar directamente con profesionais de múltiples sectores.
A plataforma, accesible a través de presentes.gal, está deseñada para localizar perfís segundo profesión, área de coñecemento ou traxectoria, favorecendo que as mulleres interveñan como expertas nos seus ámbitos e non só en debates ligados á igualdade. Incorpora ferramentas prácticas para organizar eventos desde unha perspectiva de xénero, incluíndo unha guía para promover paneis equilibrados e espacios máis igualitarios antes, durante e despois da súa celebración. Presentes é tamén unha comunidade, ao permitir que profesionais e entidades propoñan novos perfís, ampliando as redes e reforzando o apoio mutuo entre mulleres con traxectorias consolidadas ou emerxentes.
Segundo explicou a Consellería, a plataforma seguirá medrando nos vindeiros meses e aspira a converterse nun recurso estable para facilitar a participación feminina en foros, publicacións e iniciativas profesionais. A súa creación busca, en última instancia, contribuír á igualdade de oportunidades, ofrecer referentes ás xeracións máis novas e fortalecer o ecosistema profesional galego cun enfoque máis inclusivo e representativo.•
Cargando ...
