No IES Francisco Daviña Rey, docentes e especialistas compartiran experiencias educativas e proxectos de innovación tecnolóxica
O IES Francisco Daviña Rey está a acoller esta fin de semana as XXII Xornadas de Tecnoloxía de Galicia, organizadas por APETEGA e dirixidas ao profesorado interesado en mellorar metodoloxías. O encontro, previsto para os días 13 e 14 de marzo, combinará visitas técnicas, conferencias e obradoiros prácticos centrados na innovación educativa. A asociación destaca que o encontro reforza a colaboración entre centros e impulsa novas ferramentas educativas.
A programación comeza cunha visita a empresas do polígono industrial de Monforte, seguida dunha visita ao Museo do Ferrocarril. Pola tarde do venres impartiranse dúas conferencias: unha sobre patrimonio industrial ferroviario, a cargo de Luís Blanco, e outra dedicada á historia de The Wall, considerado o primeiro videoxogo galego, presentada por Álex González. A xornada continuará cunha aula aberta para compartir proxectos e pechará coa primeira quenda de obradoiros, nos que se traballará con impresión 3D, cortadora láser, electrónica básica e MicroPython, domótica Matter, técnicas OSINT e experimentación con Micro:Bit e EchidnaShield orientada á IA.
O sábado estará integramente dedicado aos obradoiros, distribuídos en catro quendas e con espazos de intercambio. Pola mañá celebrarase a asemblea anual de APETEGA, reservada ás persoas asociadas. A organización lembra que o profesorado pode participar activamente e que está solicitada a súa homologación por 12 horas. A información e os materiais necesarios están dispoñibles na web da asociación. As xornadas son xa un referente docente.•
Cargando ...
