O certame gastroturístico celébrase a lo largo de máis de sesenta establecementos da Ribeira Sacra, cunha oferta de tapas e menús a base de cocido, o prato estrela desta iniciativa
A Tenente de Alcalde de Monforte, Gloria Prada, participou na presentación da XVIII edición do certame gastroturístico “Estase Cocendo”, organizado pola Asociación Provincial de Empresarios de Hostalaría de Lugo coa colaboración do Concello. O acto tivo lugar no Centro do Viño e reuniu representantes institucionais, profesionais da hostalaría e persoas vinculadas á loita contra os incendios forestais.
Durante a súa intervención, Prada felicitou á APEHL pola continuidade dunha iniciativa que, segundo afirmou, “supón un verdadeiro impulso económico para Monforte e para a Ribeira Sacra”. A responsable municipal destacou que o Concello mantén o seu apoio ao certame porque contribúe a dinamizar a actividade hostaleira e reforzar a proxección turística da comarca. Tamén agradeceu o traballo dos establecementos participantes, que cada ano amosan “profesionalidade e creatividade” na elaboración do prato protagonista, o cocido.
A presentación incluíu unha homenaxe aos equipos de extinción de incendios e ás persoas que colaboraron na defensa das aldeas afectadas polos lumes do pasado verán. Prada sumouse ao recoñecemento e expresou a súa gratitude “polo esforzo, a valentía e o compromiso” de quen traballou para protexer a veciñanza e o patrimonio natural.
O “Estase Cocendo” desenvolverase durante as fins de semana ata o 22 de marzo en máis de sesenta locais da Ribeira Sacra. Monforte acollerá o día 21 o “Cocido das Meigas”, con actividades gastronómicas, obradoiros, música e a tradicional Noite Meiga na Praza de Abastos.•
Cargando ...
