O Concello activa a promoción dun dos seus eventos máis emblemáticos, que regresará os días 4 e 5 de abril e contará cun mercado previo o 21 e 22 de marzo
O Concello de Monforte deu a coñecer esta semana o cartel oficial da XXII Feira Medieval, unha das citas máis recoñecidas do calendario festivo local, que volverá celebrarse o sábado e domingo de Semana Santa, os días 4 e 5 de abril. Na presentación, realizada na Casa Consistorial, destacouse a importancia desta edición e o traballo de difusión que xa se puxo en marcha para reforzar o alcance da feira en toda Galicia. O alcalde, José Tomé Roca, lembrou que o Concello continúa á espera da declaración de Festa de Interese Turístico de Galicia, un recoñecemento solicitado hai dous anos e que o executivo local considera xustificado pola traxectoria e singularidade do evento.
O cartel desta edición, creado pola deseñadora monfortina Lidia Alonso, foi presentado como unha peza que busca transmitir identidade e forza visual. A imaxe central representa un guerreiro medieval coa cabeza inclinada e a espada entre as mans, nunha composición que incorpora elementos propios da iconografía local, como o escudo de Monforte reinterpretado en clave histórica. A proposta quere reforzar o vínculo coa tradición e coa memoria do antigo burgo medieval, cun deseño que destaca tamén a numeración da edición e o nome da cidade, dándolle maior peso visual á marca “Feira Medieval de Monforte”.
Segundo explicou o rexedor durante a presentación, o cartel comezará a distribuírse de inmediato en concellos, puntos estratéxicos das principais cidades e nunha selección de eventos da contorna, entre eles a Feira do Viño de Sober, co obxectivo de incrementar a proxección turística e apoiar a dinamización económica dos sectores vinculados á hostalería, comercio e servizos.
Xunto coa imaxe da feira, o Concello avanzou tamén os detalles do Mercado para a Medieval, unha actividade complementaria que terá lugar a fin de semana do 21 e 22 de marzo no recinto expositivo da Praza de Abastos. Este espazo reunirá doce postos especializados en traxes, complementos, artesanía e servizos vinculados á ambientación medieval, concibidos para facilitar que a cidadanía e os visitantes poidan preparar o seu vestiario e a decoración de negocios antes da feira. Ademais, está previsto un desfile de traxes e accesorios no exterior —sempre que o tempo o permita— e unha zona dedicada á decoración de terrazas e comedores, coa colaboración de profesionais do sector de eventos.
O mercado contará tamén cun concurso de repostaría e pastelaría, no que o público poderá votar as súas propostas favoritas en tres categorías: tradicional, innovadora e creativa. Os premios anunciaranse o domingo e está previsto un sorteo entre todas as persoas participantes. Ademais, o Concello fixou para a inauguración do mercado, o sábado 21 ás 11.30 horas, a presentación oficial do programa completo da XXII Feira Medieval, que incluirá espectáculos, demostracións, música e os tradicionais máis de 140 postos de artesanía e produtos inspirados na época.
Os horarios do Mercado para a Medieval estableceranse de 11.00 a 14.00 e de 17.00 a 21.00 horas o sábado, e de 11.00 a 14.00 e de 17.00 a 20.00 horas o domingo, configurando unha fin de semana ampla de actividade previa á celebración da feira grande.•
Cargando ...
