Pantón afronta obras de emerxencia logo dos danos causados polas choivas de febreiro

A Deputación de Lugo aprobou un paquete de investimentos que supera os dous millóns de euros destinado á mellora de estradas provinciais e municipais, así como á atención de incidencias provocadas polas intensas choivas rexistradas durante o mes de febreiro. Entre os concellos máis afectados figura Pantón, onde se acometerá unha intervención de carácter urxente para restablecer a seguridade na vía LU‑P‑4103, danada por un importante desprendemento de terra. A voceira socialista do Goberno provincial, Pilar García Porto, explicou que estas actuacións buscan “dar resposta coa máxima celeridade ás emerxencias complexas provocadas polos recentes temporais”.
No caso concreto de Pantón, a Deputación encargou á empresa TA Isidro Hnos Blanco Trigo a execución das obras necesarias para recuperar a circulación no punto afectado, situado no quilómetro 2 da estrada que comunica Ferreira co encoro de Santo Estevo. Os informes técnicos advertiron dun risco elevado de novos desprendementos, polo que foi preciso proceder á expropiación dos terreos necesarios para garantir a seguridade da intervención. O investimento previsto rolda os 600.000 euros e o proxecto definitivo quedará aprobado nos próximos días, co obxectivo de iniciar os traballos canto antes dada a relevancia social desta vía para a veciñanza e para o acceso a distintos servizos.
A actuación en Pantón forma parte dun conxunto máis amplo de obras aprobadas pola Deputación en oito concellos da provincia. Entre elas inclúense melloras en Lugo, Abadín, A Pontenova, Chantada, Carballedo, Cervantes e Mondoñedo, con actuacións que abranguen a rehabilitación de firmes, a reapertura de cunetas, a renovación de sinalización e a reparación de tramos deteriorados polos temporais. En Cervantes tamén se declarou a emerxencia na LU‑P‑1402, onde a caída parcial da calzada obriga a reconstruír a plataforma mediante un muro de escollera.
García Porto subliñou que estas intervencións permiten garantir a mobilidade e minimizar o impacto dos temporais na rede viaria provincial. A Deputación considera prioritario actuar nos puntos máis afectados para evitar riscos e asegurar que os concellos poidan manter en funcionamento as súas comunicacións básicas, especialmente en zonas rurais con maior dependencia das estradas provinciais.•