O Concello de Pantón será un dos municipios beneficiados que notarán máis o aumento do financiamento autonómico destinado ao Servizo de Axuda no Fogar, unha medida anunciada pola parlamentaria Raquel Arias e pola portavoz popular en Monforte, Katy Varela. Ambas representantes explicaron que os concellos do partido xudicial de Lemos recibirán conxuntamente máis de catro millóns de euros adicionais nos próximos tres anos, unha cifra que permitirá reforzar unha prestación esencial para numerosas familias da comarca. O incremento será posible grazas ao acordo entre a Xunta e a Fegamp, que prevé elevar nun cincuenta por cento a achega autonómica destinada ao SAF. Arias destacou que a subida, que se aplicará de maneira progresiva ata 2028, supón “unha inxección económica moi importante para os concellos e unha mellora directa para as persoas usuarias e para as profesionais que traballan neste servizo”. A aportación por hora pasará dos 12 euros actuais a 16 este ano, 17 no seguinte exercicio e 18 en 2028. A deputada lembrou que o SAF é unha competencia municipal e subliñou o impacto que ten en concellos como Pantón, onde o custo da atención domiciliaria representa unha parte relevante do orzamento anual. Pola súa banda, Varela insistiu en que o incremento do financiamento autonómico debe traducirse nun uso responsable dos recursos locais que agora quedan liberados. A portavoz afirmou que o Partido Popular “estará moi vixiante” para comprobar como se emprega ese aforro e reclamou que se destine a reforzar servizos básicos e a mellorar a atención ás persoas dependentes. Ambas representantes lamentaron o voto en contra do BNG á medida e reclamaron ao Goberno central que cumpra coa súa obriga de financiar o cincuenta por cento do sistema de dependencia, ao considerar que Galicia continúa asumindo un esforzo económico moi superior ao que lle correspondería.•
Cargando ...
