A subdelegada do Goberno en Lugo, Olimpia López, presidiu a Xunta Local de Seguridade de Quiroga coa finalidade de coordinar o dispositivo que se porá en marcha con motivo da XXVI Mostra do Aceite e da XLIV Feira do Viño, dúas celebracións que cada ano atraen a numerosos visitantes ao municipio. Na reunión participaron representantes da Garda Civil, da Policía Local e do Concello, que revisaron os detalles do operativo previsto para garantir o correcto desenvolvemento das actividades programadas ao longo da fin de semana festiva.
Durante o encontro analizáronse as medidas destinadas a reforzar a coordinación entre os distintos corpos de seguridade, prestando especial atención á prevención de incidentes, á protección das persoas asistentes e ao control da mobilidade nas zonas de maior afluencia. A subdelegada destacou que estas xuntas permiten “anticiparse ás necesidades de seguridade dos eventos do municipio e garantir que veciñanza e visitantes poidan gozar das celebracións con tranquilidade”.
Ademais da planificación específica para a Mostra do Aceite e a Feira do Viño, a Xunta Local abordou a situación xeral da seguridade cidadá en Quiroga, valorando positivamente a colaboración existente entre as administracións e os corpos policiais. Segundo se expuxo, esta coordinación resulta esencial para manter uns niveis adecuados de prevención e resposta ante posibles incidencias.
Outro dos puntos tratados foi o desenvolvemento do Plan Director para a Convivencia e Mellora da Seguridade nos Centros Educativos, que inclúe a realización de charlas impartidas pola Garda Civil no CEIP e no IES de Quiroga. Estas sesións céntranse na prevención de riscos entre a mocidade, así como na promoción dunha convivencia segura tanto no ámbito escolar como no dixital, incidindo en cuestións como o uso responsable das redes sociais, o acoso e a protección fronte a condutas de risco.
A subdelegada subliñou que o obxectivo é manter un dispositivo que permita celebrar ambas citas con normalidade, reforzando a presenza policial e garantindo unha resposta rápida ante calquera eventualidade.•
Cargando ...
