O conselleiro de Emprego, Comercio e Emigración visitou o establecemento gañador dos Premios do Comercio Galego 2025 e avanzou liñas de apoio para 2026
A Panadería Pallares, fundada en 1876 e hoxe xa na quinta xeración, recibiu a visita do conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e polo delegado territorial da Xunta en Lugo, Javier Arias. O establecemento, distinguido en 2025 co premio á Traxectoria nos Premios do Comercio Galego, foi sinalado como exemplo de continuidade familiar e adaptación aos novos tempos, cun catálogo que combina elaboración tradicional e iniciativas de valorización como o seu museo etnográfico do pan.
O conselleiro subliñou que en 2026 terá continuidade o certame de premios e detallou medidas incluídas no Plan Estratéxico do Comercio ata 2030, orientadas a reforzar un tecido de máis de 32.000 establecementos e preto de 107.000 empregos. Entre elas, tres liñas de axuda por case 4 millóns de euros , os bonos Activa Comercio, o programa Vilas Vivas e accións formativas para a profesionalización do sector.
No eido da artesanía, avanzou unha liña de 1 millón para a formación de aprendices en oficios tradicionais e a continuidade de Artesanía no Prato. Para as prazas de abastos, citou 2,3 millóns destinados á Rede de Mercados Excelentes e iniciativas de conexión co tecido hostelero como Prato de Mercado. González puxo como referente o vínculo territorial de Pallares e enmarcou o impulso ao emprendemento na Rede de polos de emprego, con presenza na propia Sarria, como eixo para consolidar actividade económica e consumo de proximidade.•
Cargando ...
