A Asociación Cultural Rizoma Lemos presentou o seu novo espazo de coworking na Avenida de Galicia, unha proposta que nace para impulsar o emprendemento e a creación cultural en Monforte. O local está concibido como un punto de encontro no que profesionais e creadoras poidan compartir recursos, colaborar en proxectos e desenvolver novas ideas nun ambiente común.
A iniciativa vai máis aló da cesión de postos de traballo. Rizoma Lemos quere consolidar unha comunidade activa, con actividades formativas e espazos de intercambio destinados a reforzar as capacidades das súas socias e socios. O proxecto aposta por conectar industrias culturais, entidades sociais e artistas co fin de xerar sinerxías que dean lugar a novas oportunidades económicas e culturais na comarca.
Un dos seus obxectivos é a creación dun ecosistema creativo estable, capaz de dinamizar a vida cultural de Monforte e contribuír ao fortalecemento do tecido profesional ligado á Ribeira Sacra. A entidade aspira a ser un referente para quen busque un espazo colaborativo desde o que emprender e xerar proxectos de impacto local.•
Cargando ...
