O desfile de traxes e o mercado temático da pasada fin de semana marcaron o inicio da conta atrás para a cita dos días 4 e 5 de abril
Monforte afronta a recta final cara á celebración da súa Feira Medieval, que terá lugar os días 4 e 5 de abril cunha programación que ocupará diferentes puntos do centro histórico e que combina recreación, animación e actividade comercial. O programa foi dado a coñecer esta fin de semana coincidindo coa celebración do Mercado para a Medieval, que serviu de antesala ao evento.
A Praza de Abastos acolleu durante dous días esta proposta previa, na que participaron unha ducia de postos con produtos vinculados á estética e ambientación medieval. Entre eles figuraban traxes, complementos, artigos de artesanía, servizos de peiteado e maquillaxe ou propostas gastronómicas. O espazo completouse cunha zona dedicada á decoración de establecementos hostaleiros.
Un dos momentos máis concorridos do programa previo foi o desfile de traxes medievais, celebrado na tarde do sábado no exterior do recinto, no que participaron modelos de diferentes idades. A actividade permitiu amosar distintas opcións de caracterización de cara á feira, nun acto que rexistrou unha elevada asistencia de público.
Tamén se desenvolveu o concurso de repostería “A polo mellor doce”, no que as persoas visitantes puideron votar polas elaboracións presentadas en varias categorías. A entrega de premios celebrouse o domingo, xunto cun sorteo entre as persoas participantes.
No que respecta á Feira Medieval, o programa estrutúrase en varios espazos do casco histórico. A Praza de España converterase no eixo central coa instalación do campamento medieval e coa celebración de espectáculos como o acto inaugural, que incluirá efectos de lume e acrobacias, así como desfiles temáticos e actuacións musicais ao longo das dúas xornadas.
Outro dos elementos destacados será o desfile do gran dragón, que percorrerá as rúas acompañado de música en directo. Ademais, a programación inclúe pasarrúas con personaxes e ambientación medieval, así como concertos e propostas de animación nocturna.
O Campo da Terra dos Escolapios acollerá as xustas medievais, con exhibicións ecuestres e combates, mentres que na Praza de San Antonio haberá exposición de aves de rapina e o espectáculo final con lume e danza. Pola súa parte, a Praza das Clarisas estará dedicada a actividades infantís e o adro da Régoa ofrecerá prácticas de tiro con arco e espazos gastronómicos.
O mercado contará con máis de 140 postos distribuídos polo conxunto histórico, con presenza de artesanía, alimentación e comercio temático. A programación completarase coa convocatoria de concursos de traxes e decoración, así como coa ambientación de rúas e fachadas para recrear o contexto medieval durante a fin de semana.•
Cargando ...
