A cidade de Lugo acolleu por primeira vez, a gala dos Premios Mestre Mateo, converténdose no epicentro do audiovisual galego nunha edición que destacou polo alto nivel das producións e pola ampla participación do sector. A cerimonia, celebrada no Auditorio Fuxan os Ventos, reuniu a profesionais da industria, representantes institucionais e público nun acto no que se recoñeceu o traballo desenvolvido ao longo do último ano.
A gran protagonista da noite foi Antes de nós, dirixida por Ángeles Huerta, que se converteu na produción máis premiada ao acadar un total de trece galardóns, igualando o récord histórico destes premios. Entre os recoñecementos destacan os de mellor dirección, guión, fotografía, dirección de arte ou montaxe, así como os premios de interpretación protagonista para Cris Iglesias e Xoán Fórneas. Pola súa banda, Sirāt, do cineasta Oliver Laxe, fíxose co premio á mellor longametraxe, ademais de sumar galardóns en categorías técnicas como música orixinal e son. A película partía como unha das favoritas desta edición, cunha ampla presenza nas candidaturas. A gala deixou tamén momentos especialmente emotivos, como o recoñecemento a Miquel Ínsua, premiado a título póstumo como mellor actor de reparto, nunha das intervencións máis lembradas da noite. Ademais, produciuse un empate na categoría de interpretación feminina de reparto, que foi compartida por Luisa Merelas e Victoria Teijeiro. Outro dos aspectos destacados foi o peso das mulleres nos premios, xa que recolleron 11 dos 16 galardóns profesionais entregados durante a cerimonia, consolidando unha presenza cada vez máis relevante no sector audiovisual galego. No ámbito televisivo, Weiss & Morales foi distinguida como mellor serie, mentres que Bechos acadou o premio á mellor serie web e Cos pés na terra foi recoñecido como mellor programa. Nas categorías de curtametraxe, Curmán levou o galardón de imaxe real e O corpo de Cristo o de animación, mentres que 360 curvas foi premiado como mellor documental. A gala, conducida por Trisha Fernández e Federico Pérez, contou tamén con actuacións musicais e coa participación de máis de 150 profesionais na súa organización. Durante o acto, a presidenta da Academia Galega do Audiovisual, Lucía Veiga, fixo un chamamento a favor da paz e destacou a importancia da colaboración dentro do sector. Entre os asistentes figurou a presidenta da Deputación de Lugo, Carmela López, quen puxo en valor a elección da cidade como sede e destacou a presenza de profesionais lucenses nunha edición que evidenciou o momento de actividade que vive o audiovisual galego.
Cargando ...
