O novo Alvia madrugador permitirá viaxes de ida e volta a Madrid no día e reforza as paradas en puntos clave como Sarria e Monforte de Lemos
Lugo contará a partir do 20 de maio cunha mellora nas conexións ferroviarias coa Meseta grazas á reorganización dos horarios impulsada por Renfe, que permitirá por primeira vez realizar viaxes de ida e volta no mesmo día con Madrid. O anuncio realizouse no Concello lucense nun acto no que participaron o delegado do Goberno en Galicia, Pedro Blanco, o presidente de Renfe, Álvaro Fernández Heredia, e o alcalde, Miguel Fernández.
ADIANTO DO HORARIO DO ALVIA LUGO-MADRID
A principal novidade será o adianto do horario do tren Alvia Lugo-Madrid, que pasará a saír ás 5:18 horas, fronte ás 11:15 actuais. Este cambio permitirá chegar á capital ás 10:13, facilitando desprazamentos por motivos laborais, administrativos ou persoais sen necesidade de pernoctar.
O novo horario inclúe paradas en Sarria, ás 5:44 horas, Monforte de Lemos, ás 6:10, Ourense, ás 6:52, e A Gudiña, ás 7:44, recuperando nesta última estación un servizo demandado pola comarca do sueste ourensán. No caso de Monforte, esta frecuencia reforza o papel da cidade como punto estratéxico na conexión ferroviaria interior de Galicia, ao facilitar desprazamentos máis áxiles cara á capital do Estado.
Durante a presentación, Pedro Blanco destacou que a reorganización responde ás necesidades detectadas no territorio e afirmou que “o Goberno de España demostra que traballa pensando no mellor para Lugo, para Ourense e para Galicia”. O delegado subliñou que esta medida atende unha demanda histórica da cidade, orientada a facilitar unha mobilidade máis adaptada á vida diaria.
Pola súa banda, o presidente de Renfe explicou que os cambios forman parte dunha revisión global da oferta ferroviaria no corredor Galicia-Madrid, co obxectivo de optimizar os servizos en función da demanda. Neste sentido, indicou que tamén se introducirán axustes noutras conexións de alta velocidade.
Así, o AVE que parte de Vigo a primeira hora adiantará a súa saída ás 5:50 e incorporará parada en Santiago de Compostela. Nos servizos de regreso, o tren Madrid-Vigo sairá ás 8:25, mentres que o Avlo cara á Coruña partirá ás 6:55, mantendo as súas paradas habituais e permitindo chegar a primeira hora a estacións intermedias como Zamora, Sanabria AV ou A Gudiña.
Ademais, o servizo de tarde Madrid-Vigo tamén modificará o seu horario, adiantando a saída ás 15:32. O conxunto destas medidas pretende reforzar a mobilidade matinal e mellorar a distribución de frecuencias ao longo do día.
O acto contou tamén coa presenza da subdelegada do Goberno en Lugo, Olimpia López, e serviu para destacar a colaboración institucional na mellora das infraestruturas. Pedro Blanco puxo en valor o traballo do alcalde lucense e sinalou que a coordinación entre administracións resulta clave para avanzar en proxectos vinculados ao transporte.
Ao longo da xornada, os responsables institucionais desprazáronse tamén ao concello da Gudiña para informar sobre a recuperación da parada ferroviaria, considerada relevante para o conxunto do territorio oriental de Ourense.•
Cargando ...
