Foto GPPP.
O voceiro do PP na Pobra do Brollón, Teddy López, criticou publicamente que o alcalde non convocase ningún pleno municipal desde o pasado 18 de decembro. Segundo lembrou, o pleno de organización estableceu que as sesións ordinarias deben celebrarse cada dous meses, polo que considera que se está vulnerando un compromiso básico de funcionamento democrático. López sostén que esta ausencia prolongada de convocatorias “é unha falta de respecto” tanto para a oposición como para o conxunto da veciñanza.
O representante popular afirmou que esta situación non é un caso illado e que, segundo conversas mantidas con compañeiros doutras localidades, existen concellos gobernados por PSOE e BNG que atravesan escenarios similares. Ao seu xuízo, trátase dunha práctica que dificulta a fiscalización da acción de goberno e reduce a transparencia municipal. “O alcalde non convoca o pleno porque evita render contas e someter a súa xestión ao debate público”, sinalou.
López advertiu tamén das consecuencias administrativas que pode ter a falta de plenos, lembrando que determinados asuntos, como a aprobación dos orzamentos, só poden resolverse en sesión plenaria. Neste sentido, alertou de que a situación podería derivar nunha parálise da actividade municipal se non se recupera a normalidade institucional.
O PP reclama que se convoque canto antes unha sesión ordinaria e insiste en que o pleno é o espazo fundamental para garantir o control político e a participación democrática no Concello.•
Cargando ...
