Os senadores do Partido Popular pola provincia de Lugo advertiron da ausencia de prazos concretos para a posta en marcha da electrificación da liña ferroviaria entre Lugo e Monforte de Lemos, tras recibir resposta do Goberno de España ás preguntas formuladas na Cámara Alta. Segundo sinalan, as obras están en execución pero non existe unha data oficial para a súa entrada en servizo.
Os representantes populares alertan de que esta situación podería manter o uso de material diésel na liña, ao estar integrada nun corredor no que outros tramos, como o que conecta Lugo coa Coruña, continúan sen electrificar. Neste contexto, lembran que os servizos actuais seguen operando con trens convencionais de media distancia.
Desde o PP cuestionan o impacto real dos investimentos anunciados polo Ministerio de Transportes e consideran que non se traducen nunha mellora efectiva do servizo. Ao seu xuízo, a provincia continúa sen contar cun sistema ferroviario equiparable ao doutras zonas, tanto en prestacións como en frecuencias.
En relación co recente anuncio de modificación dun dos horarios entre Lugo e Madrid, sinalan que se trata dun cambio nun servizo xa existente e non dun incremento de conexións. A este respecto, a presidenta provincial Elena Candia insiste na necesidade de ampliar frecuencias e avanzar cara a unha conexión ferroviaria máis competitiva.•
Cargando ...
