O Concello de Quiroga presentou o programa completo da XLIV Feira do Viño, que se desenvolverá entre o 3 e o 5 de abril e que chega acompañado dunha serie de actividades previas. Este sábado terá lugar o tradicional desfile da Confraría do Viño, acompañado polo grupo de gaitas O Recanto, marcando o inicio simbólico da celebración. A programación inclúe tamén o torneo de fútbol sala ligado á feira, que se disputará no pavillón municipal entre o 30 de marzo e o 2 de abril, así como a apertura da exposición “Líneas Exquisitas”, da artista Luz Moscoso. O venres 3 abrirase oficialmente a feira coa cata dos viños participantes, que se desenvolverá en dúas sesións na rúa Lago. Pola noite abrirase o recinto feiral, onde se exhibirán e venderán os viños das adegas participantes. A xornada rematará coa actuación da banda tributo “Rosies in Hell” e unha sesión musical posterior. O sábado celebrarase o Certame Celtibérico de Bandas de Gaitas “Memorial Muíño”, e pola tarde terá lugar o pregón, a cargo dos actores Edu Soto e Iván Massagué. Os pregoeiros entregarán os premios dos concursos de camisetas, cartel e tapas. O domingo continuará a feira con animación musical a cargo de grupos tradicionais. As adegas da subzona Quiroga‑Bibei e unha adega convidada da D.O. Ribera del Duero ofrecerán os viños protagonistas desta edición. •
Cargando ...
