Nove centros en funcionamento ofrecen coidados personalizados e promoven o benestar das persoas maiores
A rede de residencias impulsada pola Deputación de Lugo segue a gañar peso como un dos piares da política social da institución, cun total de nove centros actualmente en funcionamento en distintos puntos da provincia. Trátase dun modelo público de atención a maiores asentado en concellos de pequeno tamaño, co obxectivo de achegar servizos asistenciais ao rural e facilitar que as persoas usuarias poidan continuar no seu entorno máis próximo.
Os tres primeiros Centros de Atención a Maiores abriron as súas portas en 2019 en Trabada, Pol e Ribadeo. Desde aquela, a rede foi medrando coa incorporación doutros seis equipamentos en A Fonsagrada, Castroverde, Meira, Pedrafita do Cebreiro, Navia de Suarna e Ribas de Sil. A maiores, a Deputación mantén en fase de construción novas residencias en Becerreá, A Pobra do Brollón, Guitiriz e A Pontenova, dentro dun plan máis amplo integrado por dezaoito instalacións en total.
O modelo escollido pola administración provincial baséase en centros de dimensión reducida, orientados a ofrecer unha atención máis próxima e personalizada. Na actualidade residen neles arredor de 300 persoas, que reciben un seguimento integral adaptado ás súas necesidades físicas, funcionais, cognitivas e sociais.
ENVELLECEMENTO ACTIVO
A organización dos coidados articúlase a través de equipos profesionais multidisciplinares que desenvolven unha atención individualizada en función da situación de cada residente.
A vida diaria nestes centros complétase cunha programación estable de actividades dirixidas a favorecer o envellecemento activo. Entre as propostas figuran obradoiros de estimulación cognitiva, exercicio físico adaptado, dinámicas de socialización e iniciativas culturais e de lecer. O obxectivo destas accións é contribuír ao mantemento da autonomía persoal e promover un ambiente participativo no día a día das residencias.
Outro dos trazos deste sistema é a súa implantación en concellos de menos de 20.000 habitantes, unha circunstancia que permite reducir o desarraigo territorial e emocional das persoas maiores. Deste xeito, as residencias manteñen aos usuarios vinculados á súa contorna habitual e reforzan tamén a conexión coa comunidade local.
A Deputación presenta esta rede como unha resposta ao reto demográfico e á necesidade de garantir coidados públicos de calidade en toda a provincia, con independencia do lugar de residencia. A expansión destes centros busca, neste sentido, combinar proximidade, atención personalizada e igualdade de acceso aos servizos asistenciais. Deféndese unha rede asentada no ámbito local, pensada para evitar desprazamentos forzados e ofrecer un recurso estable ás familias no medio rural.•
Cargando ...
