O paro baixa en todas as provincias e sectores mentres medra o número de cotizantes á Seguridade Social
Galicia pechou o pasado mes de marzo con 1.095.875 afiliacións á Seguridade Social e 114.670 persoas rexistradas no paro, uns datos que sitúan a comunidade galega nos mellores rexistros para este período desde que existen series estatísticas. En comparación co mesmo mes do ano anterior, o número de cotizantes medrou en 16.479 persoas, mentres que o desemprego baixou en 4.485.
A evolución interanual do paro supón unha redución do 3,76 %, cun descenso nas catro provincias galegas e en todos os sectores de actividade. A construción encabezou a baixada, seguida do sector primario, da industria e dos servizos. Tamén melloraron os datos nos colectivos considerados prioritarios. No caso das mulleres, o número de desempregadas reduciuse en 2.434 persoas respecto a marzo de 2025, mentres que entre os parados de longa duración a caída foi de 3.514.
Na comparación co mes de febreiro, o paro diminuíu en 1.388 persoas, o que representa unha baixada do 1,20 %, por riba da media estatal. Pola súa banda, as afiliacións creceron tamén en termos mensuais, con 7.644 altas máis, un incremento do 0,70 %.
Na valoración destes datos, o conselleiro de Emprego, Comercio e Emigración, José González, incidiu en que a evolución debe analizarse tamén desde unha perspectiva de medio e longo prazo dentro do mercado laboral galego, no que se mantén a tendencia de mellora ao remate do primeiro trimestre do ano en Galicia.•
Cargando ...
