O Concello de Bóveda fixo pública a normativa que rexerá o funcionamento do Viveiro Industrial de Empresas, un espazo situado no parque empresarial municipal destinado a apoiar proxectos industriais de nova creación. O regulamento, que se converteu en definitivo ao non presentarse alegacións durante o período de exposición pública, establece o procedemento de acceso aos espazos, as condicións de uso e as relacións entre os beneficiarios e a administración local. O alcalde, José Manuel Arias, destacou que a aprobación deste documento “supón un paso decisivo para avanzar na incorporación das primeiras iniciativas e contribuír á creación de emprego no municipio”. O viveiro dispón dunha nave principal, catro oficinas, zonas comúns e un espazo destinado a formación práctica, unha infraestrutura pensada para facilitar o arranque de proxectos mediante cesión temporal en condicións vantaxosas. Entre os servizos previstos inclúense asesoramento técnico, apoio administrativo, acceso a recursos telemáticos, servizos de reprografía e acompañamento na procura de subvencións. Poderán optar persoas emprendedoras ou empresas de recente creación cun plan de negocio viable e compromiso de establecer o domicilio social en Bóveda. A selección realizarase mediante convocatoria pública, valorándose criterios como a viabilidade económica, o potencial de creación de emprego, o carácter innovador das propostas ou determinados aspectos sociais. As empresas poderán permanecer nas instalacións durante un período inicial de doce meses, prorrogable ata un máximo de corenta e oito. O investimento total destinado á creación e mellora do viveiro supera os cincocentos mil euros, cunha achega adicional destinada a mellorar a eficiencia enerxética e as prestacións técnicas do edificio.•
Cargando ...
