Sarria recuperou a pasada fin de semana a súa Feira do Libro cun balance positivo tanto pola participación de autores como pola resposta do público, nun evento que tivo lugar en distintos espazos da vila. A cita reuniu arredor dunha vintena de escritores e escritoras da comarca, nun programa que combinou presentacións, mesas de debate e actividades dirixidas a diferentes públicos.
A programación estruturouse en varias xornadas nas que se abordaron cuestións relacionadas coa creación literaria, como o proceso de escritura, a inspiración ou a relación entre memoria e territorio. Tamén se trataron aspectos como a transversalidade entre disciplinas artísticas, incorporando reflexións sobre a conexión da literatura con outras expresións culturais.
O encontro contou ademais coa participación de librarías locais, que habilitaron espazos de venda directa para achegar as obras ao público asistente. A actividade completouse con propostas para público infantil e intervencións musicais.
Desde o Concello destacouse a boa acollida desta edición e avanzouse a intención de darlle continuidade nos vindeiros anos, co obxectivo de afianzar a feira dentro do calendario cultural da vila e seguir dando visibilidade ao talento literario da contorna.•
Cargando ...
