A formación especializada centra unha xornada sobre emprendemento hostaleiro en Monforte

O Polo de emprendemento e apoio ao emprego de Monforte acolleu recentemente unha xornada centrada na dinamización do sector hostaleiro a través da formación, un encontro no que se puxo de relevo o papel deste recurso no impulso de novas iniciativas empresariais. A actividade contou coa participación de representantes institucionais e persoas vinculadas ao ámbito emprendedor e formativo.
Durante o acto, destacouse a traxectoria do centro monfortino, que xa asesorou máis de 350 proxectos empresariais e contribuíu á posta en marcha dunha ducia de negocios. Estes datos forman parte do balance da Rede de Polos na provincia, que suma arredor de 1.300 iniciativas acompañadas desde as súas oficinas.
O equipo técnico do Polo de Monforte desenvolveu máis dun milleiro de sesións individualizadas de orientación, cunha participación destacada de mulleres, que representan máis da metade das persoas atendidas. Entre os sectores con maior presenza figura a hostalaría, que concentra unha quinta parte dos proxectos impulsados.•