O pasado 29 de abril tivo lugar a presentación a programación da XXXI Mostra de Viños da Ribeira Sacra de Pantón, que se desenvolverá na segunda fin de semana de maio, do 8 ao día 10.
A presentación tivo lugar na adega Losada Fernández S.L. coa participación do alcalde do concello de Pantón, José Luis Álvarez; a concelleira de Cultura, Cristina Domínguez e o adegueiro anfitrión, Ramón Losada.
A cita mantén a estrutura de celebración da última edición, séguese con 3 días de celebración, ampliando ao venres e mantéñense as actividades vinculadas co viño que se iniciaron o ano pasado con sesión de cata maridaxe “Sabores da Ribeira Sacra” o venres, e a celebración o sábado da I Cata Popular da Mostra de Viños da Ribeira Sacra de Pantón.
A concelleira de Cultura, Cristina Domínguez, destacou que estas actividades, que se fan en colaboración con Vinosacra, son gratuítas e teñen aforo limitado polo que se necesita inscrición previa que xa está abertano teléfono 982 456 377. “O ano pasado funcionaron moi ben estas novidades e coas suxestións que fan as adegas seguimos cada ano mellorando a oferta de actividades”, sinalou.
Participan da Mostra de Viños da Ribeira Sacra de Pantón 8 adegas: Alma das Donas, Casa Moreiras, Finca Míllara, Ciudaseis, Nogueiras, Saíñas, Don Ventura e Corzoás (Capilla desculpa a súa ausencia nesta edición por motivos persoais). Na xornada do venres as casetas abriranse ás 19:00h e comezarase coa cata maridaxe, ás 20:30h será a inauguración a cargo de Xosé Manuel Merelles Remy, Director da Axencia de Turismo de Galicia.
Programación completa da XXXI Mostra de Viños da Ribeira Sacra de Pantón:
Venres, 8 de maio:
- 19:00h Apertura das casetas no recinto feiral e cata maridaxe dirixida Diego e Guillermo Centeno Marquina (cociñeiros do restaurante Vértigo, en colaboración con Ana Sofía Emidio Martínez (sumiller do restaurante Vértigo) e Vinosacra
- 20:30h Inauguración XXX Mostra de Viños da Ribeira Sacra de Pantón por Xosé Manuel Merelles Remy, Director da Axencia de Turismo de Galicia da Xunta de Galicia.
- 20:40.- Actuación da charanga Louband.
- 23:00.- Actuación do grupo musical Top Lider
Sábado 9 de maio:
- 12:00.- 1ª Cata popular da Mostra de Viños da Ribeira Sacra de Pantón no recinto feiral, en colaboración con Vinosacra. (primeira sesión).
- 13:30.- Brinde do Viño, simultáneo en toda España, por mor do DÍA MOVEMENTO VIÑO D.O. Lugar: Campo da Feira.
- 14:30.- IX Festa da Empanada, no recinto do Castro. Haberá á venda empanadas e produtos da terra.
- 17:00.- 1ª Cata popular da Mostra de Viños da Ribeira Sacra de Pantón no recinto feiral, en colaboración con Vinosacra. (segunda sesión)
- 20:30.- Actuación da charanga Os Festicultores.
- 23:00.- Música a cargo do grupo Claxon
Domingo 10 de maio:
- 12:00.- Recepción de autoridades no recinto feiral.
- 13:00.- Pregón da XXXI Mostra de Viños da Ribeira Sacra de Pantón a cargo de don Luis L. Paadín, Enólogo e sumiller. Profesor de Análise Sensorial e Servizo, Técnico de Viticultura e Enoloxía (Universidade de Vigo). Lugar: Campo da Feira.
- 19:00.- Actuación da orquestra Gran Parada.
Durante toda a fin de semana haberá actuacións musicais. Para facilitar a participación da xente contarase con servizo de autobús con Monforte e Escairón. (Horarios en cartel adxunto).
O alcalde de Pantón, José Luis Álvarez, lembrou o carácter familiar da celebración e desexou unha boa climatoloxía para poder participar de todas as propostas da Mostra e desfrutar tamén dos recursos que o municipio ofece ao visitante, “temos as 3 ribeiras, a auga dos ríos e balneario, Augacaída, campo de golf, románico, paisaxe, tradición e moita festa de homenaxe ao viño durante 3 días”, aseguraba o alcalde.
Pola súa banda, o adegueiro, Ramón Losada, destacou o esforzo para mellorar esta celebración cada ano e o traballo diario nas adegas para conservar a calidade vinculada ao traballo na ribeira, “Don Ventura elabora unicamente viño tinto con uvas das ribeiras que temos no Sil e no Miño, entendemos que esa é a produción propia de aquí e aínda que hai un grande esforzo detrás, tradúcese en calidade”.
Cargando ...
