Monforte rende homenaxe aos policías Eusebio Cuesta e Francisco Cao coa Medalla de Ouro do Concello

O Pleno extraordinario do concello de Monforte recoñeceu a entrega dos axentes da Policía Local no accidente sufrido en acto de servizo en agosto de 2025

O Concello de Monforte de Lemos celebrou o pasado 20 de abril un Pleno extraordinario no que se fixo entrega da Medalla de Ouro municipal aos axentes da Policía Local Eusebio Cuesta Vázquez, a título póstumo, e Francisco Cao de Jesús, en recoñecemento á súa actuación nun accidente ocorrido en acto de servizo no verán de 2025. A sesión contou coa presenza de familiares, compañeiros e representantes institucionais, e comezou cun minuto de silencio en memoria do axente falecido.
O sinistro produciuse na madrugada do 23 de agosto, cando ambos policías participaban nun operativo para dar o alto a un condutor que tratara de evitar un control de alcoholemia. Durante a persecución, o vehículo provocou un accidente no que perdeu a vida Eusebio Cuesta e resultou ferido o seu compañeiro. A Corporación municipal acordara xa no mes de outubro conceder esta distinción de forma unánime, que se materializou agora nun acto institucional cargado de simbolismo.
Durante a súa intervención, o alcalde destacou que aquela xornada “é un día de triste recordo para o Concello de Monforte e, de xeito especial, para o Corpo de Policía Municipal”, ao tempo que puxo en valor o labor desenvolvido polos dous axentes. Subliñou que con esta homenaxe se pretende recoñecer “a valentía e compromiso destes profesionais coa cidadanía e coa seguridade de todos os veciños e veciñas”.
O rexedor fixo fincapé na dimensión humana da súa traxectoria, sinalando que “Eusebio e Francisco non son só nomes nunha placa ou nun uniforme, senón o reflexo do sacrificio, da entrega e da coraxe”. Neste sentido, incidiu en que o exercicio da función policial implica “unha vocación de risco asumido, estando onde se lles necesita, a miúdo poñendo en segundo plano a súa propia integridade”.
A imposición das medallas supón o peche formal do procedemento de concesión de honras e distincións, mais tamén un recoñecemento público ao compromiso demostrado polos dous axentes no desempeño do seu traballo. O alcalde trasladou tamén unha mensaxe de apoio ás familias e ao corpo policial, lembrando que “o recordo do seu labor permanecerá vivo no Concello”.
A sesión desenvolveuse nun ambiente marcado pola emoción e polo respecto, nun acto co que a institución local quixo deixar constancia do agradecemento colectivo a quen exerceu o seu servizo público ata as últimas consecuencias.•