As rutas ferroviarias percorrerán o río Sil e o Miño, grandes reclamos turísticos da Ribeira Sacra
A nova tempada dos Trens Turísticos de Galicia chega cun calendario no que a Ribeira Sacra volve ocupar un lugar destacado. Turismo de Galicia, en colaboración con Renfe e o INORDE, puxo xa á venda os billetes para as rutas que percorren os vales do Sil e do Miño, un dos itinerarios máis consolidados dentro desta iniciativa que combina desprazamentos en tren con visitas guiadas a espazos naturais e culturais. As viaxes pola comarca están programadas para os días 6, 13 e 27 de xuño e 11 de xullo, datas que adoitan rexistrar unha elevada demanda debido ao interese que esperta a paisaxe fluvial e o patrimonio asociado ao territorio.
A oferta da Ribeira Sacra intégrase nun programa máis amplo que inclúe tamén a Ruta dos Faros, con saída desde Ferrol e recoñecida recentemente cun premio internacional, e a Ruta de Monterrei, que incorpora visitas ao castelo, a unha adega e ao Ecoespazo do Rexo. A reserva dos billetes realízase a través da web de Renfe, onde tamén se poden adquirir as saídas previstas para xuño e xullo destes itinerarios. Ademais, está previsto que a Ruta dos Faros incorpore novas datas o 29 de agosto e o 26 de setembro, mentres que a de Monterrei contará cunha saída adicional o 29 de agosto.
No caso da Ribeira Sacra, o percorrido mantén o seu formato habitual, con paradas en miradoiros, mosteiros e puntos de interese que permiten interpretar a configuración dun territorio marcado pola relación entre a actividade humana e os ríos. A programación inclúe tamén a Ruta do Ribeiro-Rías Baixas, dispoñible para o 18 de xullo, e outras propostas con saída desde Ourense, como a Ruta de Valdeorras, porase á venda máis adiante unha vez confirmados os trens de achegamento.•
Cargando ...
