A dirección socialista cualifica a moción de censura de “indecente”
A secretaria de Organización do PSdeG, Lara Méndez, cargou con dureza contra a moción de censura que permitiu ao PP recuperar a Alcaldía de Lugo e definiu a operación como unha “moción indecente” que, ao seu xuízo, alterou o resultado expresado pola cidadanía nas eleccións municipais de 2023. A dirixente socialista asegurou que a chegada de Elena Candia ao goberno local responde a unha estratexia baseada no “mercadeo político” e sostivo que a veciñanza “non esquecerá” o ocorrido cando volva ás urnas dentro de dous anos.
Méndez vinculou a nova etapa política en Lugo coa incorporación da concelleira non adscrita María Reigosa á maioría que fixo prosperar a moción. Neste sentido, afirmou que xa se están producindo “contraprestacións” a través da atribución de novas funcións e responsabilidades. “Está demostrado que aquí houbo contraprestación”, insistiu, ao tempo que acusou á nova alcaldesa de actuar seguindo un modelo político baseado na confrontación e nos acordos de conveniencia.
A responsable socialista tamén asegurou que nas rúas da cidade existe unha “indignación tremenda” pola mudanza no goberno municipal. Segundo explicou, moitos veciños seguen considerando a Miguel Fernández como alcalde e trasladan ao PSdeG o seu malestar en conversas cotiás, concentracións e mensaxes de apoio. Lara Méndez defendeu que o resultado electoral de 2023 apostaba por “un goberno progresista” e reprochou a Candia non agardar ás próximas eleccións para tentar acceder á Alcaldía a través das urnas.
Durante a súa intervención, a ex alcaldesa lucense tamén advertiu de que nos próximos meses poderían desbloquearse proxectos que, ao seu entender, estiveron paralizados durante anos. Citou entre eles o Plan Paradai, a zona de baño ou o Museo da Romanización. Para Méndez, a posta en marcha destas iniciativas evidenciaría que existiu unha estratexia previa de bloqueo político.
A socialista concluíu acusando ao novo executivo local de fomentar a división entre colectivos sociais, empresariais e veciñais da cidade, ao tempo que alertou dunha etapa marcada pola “crispación” e pola confrontación política no Concello de Lugo.•
Cargando ...
