Monforte será un dos puntos de parada da Vuelta Aérea Internacional Aerodreams 2026
O aeródromo municipal de As Lamas converterase este mes nun dos puntos estratéxicos da Vuelta Aérea Internacional Aerodreams 2026, unha travesía que reunirá 16 aeronaves ultralixeiras e 29 participantes nun percorrido por distintos aeródromos de España e Portugal. A expedición fará parada en Monforte o 15 de maio, coincidindo coa segunda xornada da ruta aérea iniciada en Benavente.
O alcalde de Monforte, José Tomé, destacou que a elección da cidade do Cabe responde ao proceso de modernización realizado recentemente nas instalacións municipais. O rexedor lembrou que o Concello acometeu o pasado ano diversas actuacións de mellora na pista e nos accesos do recinto, cun investimento superior aos 260.000 euros. Segundo indicou, estas obras permitiron reforzar a seguridade e operatividade dunha infraestrutura cunha actividade constante ao longo do ano.
A programación da VAIA 2026 prevé que as aeronaves despeguen o 14 de maio desde Benavente para continuar ata Valença do Minho. Ao día seguinte, os pilotos realizarán unha parada previa en Lugo antes de chegar ao aeródromo monfortino, onde está prevista a pernocta tanto dos participantes como dos seus acompañantes. A organización explicou que a escala na capital da Ribeira Sacra tamén busca favorecer o contacto dos visitantes co patrimonio e coa oferta turística da zona.
Os responsables da proba, Jackie e Paulo, subliñaron ademais o valor simbólico que ten para eles a presenza en Monforte, cidade coa que aseguran manter unha vinculación persoal a través do apelido Lemos. Tamén destacaron a situación privilexiada do campo de voo, situado a poucos minutos do centro urbano.
O Concello considera que esta cita pode ter repercusión directa sobre sectores como a hostalaría, o comercio e o turismo. José Tomé sinalou que o aeródromo recibe cada ano aeronaves procedentes de distintos puntos de Galicia, así como de Portugal, Asturias, Castela e León ou Francia, consolidándose como unha referencia para clubs e pilotos privados do noroeste peninsular.
As Lamas conta con autorización oficial como campo de voo desde 2012 e, na actualidade, acolle entre 300 e 500 operacións anuais. Ademais de servir como base para voos recreativos, tamén é empregado por empresas especializadas en traballos aéreos e gravación audiovisual cada ano. O recinto foi escenario noutras ocasións de encontros aeronáuticos e de etapas da Volta Aérea Ibérica entre España e Portugal.•
Cargando ...
