O PSdeG de Sarria reclamou a reapertura urxente do matadoiro municipal, pechado desde hai máis de tres semanas. O portavoz socialista, Benjamín Escrontela, advertiu das consecuencias que esta situación está a provocar en gandeiros, carnicerías, pequenas explotacións e empresas vinculadas ao sector cárnico da comarca, obrigadas a recorrer a instalacións doutros concellos e asumir novos custos.
Os socialistas consideran que o matadoiro representa un servizo estratéxico para manter actividade económica ligada ao rural e ao produto de proximidade e criticaron que o executivo de Claudio Garrido non actuase “con urxencia” para resolver os problemas técnicos e garantir a continuidade do funcionamento das instalacións.
Escrontela sostén ademais que o actual peche evidencia unha falta de aposta política polo servizo. O PSdeG lembrou que o matadoiro xa permanecera clausurado durante varios meses en 2024 e asegura que a súa reapertura se produciu pola presión exercida polo sector e a veciñanza. Tamén puxo en valor o apoio económico doutras administracións ao mantemento e mellora do recinto.
A formación socialista pediu ao Concello que informe publicamente do estado das reparacións e dos prazos previstos para recuperar a actividade. Tamén solicita a elaboración dun plan de mantemento que evite novos peches prolongados nunha infraestrutura que consideran clave para a economía local.•
Cargando ...
