O Festival do Paradiso regresa a Monforte

O Festival do Paradiso volverá celebrarse o vindeiro 23 de maio no Ateneo Casino de Monforte, nun encontro promovido polo colectivo Os Náufragos que busca recuperar o espírito cultural que marcou varias xeracións na comarca. A organización explica que o regreso do evento responde á vontade de “lanzar un berro colectivo, cheo de rabia e de furia necesaria”, evocando as palabras do poeta Lois Pereiro.
A nova edición reivindica as raíces poéticas do festival e, ao mesmo tempo, incorpora propostas que conectan coas inquietudes das xeracións máis novas. Segundo sinalan desde o colectivo, a iniciativa pretende servir de punto de encontro para “nostálxicos, mariñeiros do interior e visitantes de dimensións descoñecidas”, nunha xornada que combinará música, poesía e intervencións artísticas.
Os organizadores lembran figuras que inspiraron o proxecto, como Manuel María, Mario Roldán ou Antón Valcarce, cuxas obras continúan a influír na creación cultural local. O festival preséntase así como un espazo para reivindicar a identidade propia e fortalecer a comunidade a través da cultura.
O evento, de acceso libre, contará con actuacións de poetas e músicos que preparan un repertorio para esta edición. O colectivo anima a veciñanza a asistir á xornada cultural.•