A Deputación reclama blindar por lei as institucións fronte ao transfuguismo

O pleno provincial aprobou unha iniciativa socialista para promover un pacto galego que impida alterar as maiorías saídas das urnas

“A resposta cidadá foi rotunda, miles de persoas concentráronse na maior mobilización política rexistrada en Lugo en moitos anos. Non podemos permitir que se modifique así a vontade dos veciños e veciñas e tampouco que as mocións de censura queden amparadas por prácticas de transfuguismo”, valorou a Presidenta da institución provincial, Carmela López, á entrada do Pleno. Foto GPPSdeG.

O pleno da Deputación de Lugo aprobou unha moción impulsada polo Grupo Provincial Socialista para promover un pacto galego contra o transfuguismo político e avanzar cara a unha futura norma autonómica que limite o uso de edís tránsfugas para modificar maiorías de goberno. A iniciativa saíu adiante cos votos favorables do PSdeG, do BNG e do deputado non adscrito, mentres o PP se posicionou en contra.
A proposta chegou ao pleno despois da moción de censura rexistrada no Concello de Lugo, que permitiu o cambio de goberno municipal co apoio dunha concelleira elixida nas listas socialistas. Durante o debate, a voceira provincial socialista, Pilar García Porto, advertiu de que este tipo de operacións “debilitan a confianza da cidadanía nas institucións” e considerou necesario reforzar mecanismos legais e políticos que impidan “converter a deslealdade nun atallo para acceder ao poder”.
O texto aprobado aposta pola apertura dun proceso de diálogo entre as forzas con representación parlamentaria para elaborar un acordo autonómico que fixe límites ao transfuguismo e desenvolva instrumentos de control e prevención. Entre outras cuestións, reclama evitar que estas prácticas dean lugar a beneficios políticos ou institucionais.
A iniciativa tamén insta ao Partido Popular a aplicar os seus propios estatutos internos, que tipifican como falta grave utilizar persoas tránsfugas para modificar gobernos locais. Ademais, rexeita a posibilidade de suavizar esa regulación mediante cambios normativos dentro da formación popular.
Antes da sesión plenaria, a presidenta da Deputación, Carmela López, puxo o foco na resposta social xerada tras a moción de censura en Lugo, lembrando a mobilización cidadá rexistrada na Praza Maior. Segundo indicou, “non se pode permitir que a vontade expresada nas urnas se altere mediante prácticas deste tipo”.
O acordo aprobado no Pleno inclúe tamén unha condena institucional a calquera operación política orientada a modificar maiorías democráticas mediante transfuguismo e expresa o apoio da Deputación ás mobilizacións convocadas en defensa da estabilidade institucional e do resultado electoral saído das municipais de 2023.•