O Plan Básico Municipal de Pantón servirá para delimitar os núcleos rurais e o solo rústico
A Xunta de Galicia fixo público o informe ambiental estratéxico correspondente ao Plan Básico Municipal (PBM) de Pantón, un paso clave dentro do procedemento de avaliación ambiental simplificada. A Dirección Xeral de Calidade Ambiental e Sostibilidade determina que o plan non xerará efectos ambientais significativos, aínda que establece condicións que deberán ser atendidas durante o seu desenvolvemento. O documento permitirá avanzar cara á aprobación dun instrumento de ordenación propio para o municipio, que actualmente carece de planeamento xeral.
O PBM servirá para delimitar os núcleos rurais e o solo rústico, facilitando a actividade urbanística básica sen introducir criterios de crecemento urbano. Tras a súa emisión, o informe foi remitido á Dirección Xeral de Urbanismo e publicado no Diario Oficial de Galicia e no portal da Consellería de Medio Ambiente, continuando así a súa tramitación administrativa.
A Xunta lembra que os Plans Básicos Municipais están pensados para concellos de menos de 5.000 habitantes que non dispoñen dun plan xeral, como é o caso de Pantón. Ata o de agora, Galicia era a única comunidade autónoma que debía informar sobre bens de todo o territorio con independencia do seu grao de protección, o que supuña a xestión anual duns 30.000 expedientes. As modificacións normativas buscan reducir estes prazos e evitar que a protección patrimonial limite o desenvolvemento de proxectos municipais.•
Cargando ...
