O conselleiro de Cultura, Lingua e Xuventude, José López Campos, mantivo unha reunión de traballo co alcalde de Bóveda, José Manuel Arias, centrada na análise de novas vías de colaboración para reforzar os equipamentos culturais do municipio. O encontro permitiu avanzar na planificación da programación de verán e na preparación de iniciativas vinculadas ao Xacobeo 2027, tendo en conta a proximidade do concello ao Camiño de Inverno e o seu potencial para acoller actividades durante os próximos anos.
Ademais da mellora das infraestruturas, abordáronse propostas relacionadas coa dinamización cultural da lingua galega, o impulso de accións dirixidas á mocidade e a conservación e posta en valor do patrimonio local. López Campos explicou ao rexedor as modificacións introducidas na Lei de acompañamento dos Orzamentos que afectan á Lei do Patrimonio Cultural de Galicia, orientadas a reducir os tempos de tramitación dos expedientes vinculados á protección patrimonial.
Segundo indicou o conselleiro, Galicia era ata agora a única comunidade autónoma que debía informar sobre bens de todo o territorio con independencia do seu grao de protección, o que supuña a xestión anual duns 30.000 expedientes cun prazo de resolución que podía prolongarse entre seis e doce meses. As modificacións buscan axilizar estes procedementos para facilitar o desenvolvemento de proxectos municipais sen comprometer a preservación do patrimonio.•
Cargando ...
